萬事起頭難？七成Startup失敗收場 前員工：「計劃永遠趕不上變化。」
近年來，初創公司（下稱Startup）如雨後春筍，冒頭很快，但發展多數停滯不前，慢慢消失於市場。當然，也有些公司能茁壯成長，持續發展成獨當一面的企業。根據坊間不同機構的調查報告，世上約75-90%的Startup以失敗告終，福布斯(Forbes)在今年年中亦撰寫文章探討為何高達七成的Startup都結局黯淡。如果打算選擇進入Startup，謹記考查清楚喇！小編找來3位曾在Startup打滾的朋友訪問，統一結論是：不了，不了。
Ryan：擁有10年Digital Marketing經驗，畢業後一直在大型的Marketing Agency工作，3年前毅然投身一間Startup。
Mandy：擁有8年E-commerce經驗，畢業後第一份工作是本地中小企，此後6年都是在跨國大公司工作。
Irene：畢業後直接進入銀行的的MT Progamme ，一年前被挖角到Startup擔任CFO，至今仍在奮鬥。
天氣不似預期 執笠一瞬間！
Mandy和Ryan兩人的背景略為相似，都是土生土長的香港人，小學、中學、本地大學主修商科，循規蹈矩的進入職場成為一個上進的打工仔。在大公司中辛勤數年，由初級小薯慢慢升遷至接近經理級別，但日常工作卻有諸多不如意。Ryan早幾年已心思思想轉工，不時見工但都沒有合心意的工作。直至3年前，認識到一間剛在香港創設的英資公司，公司本身在英國得到天使基金進而赴港發展亞洲市場，目標是開創新式的自由創業平台。
他回憶道：「第一次和老細見面，喺一間Cafe，大家談天說地，講到創意對生意嘅重要性。佢嘅睇法同我好類似，對於Marketing都好着重。我而家喺大公司，好多時都容不下創意，少做少錯，唔做唔錯，沿用以往Marketing計劃，客人收貨就得。一直想轉間有大啲自主性、創意空間嘅公司，當下傾完已經對份工好有興趣。」結果，他正式投入Startup，的確體驗到前所未有的自由。
新公司只有10人，CEO及CFO都是英國人，同事來自世界各地，他成為了Marketing總監，擁有話事權，不再是汽車的小齒輪，反而成為司機能夠控制軚盤。可惜，整個部門只有2人，工作量相應增加，每天加班到10點是基本，偶爾還會在辦公室過夜通宵工作。周末一睡不醒，不時錯過與女友的約會時間，引來無數爭吵。有得就有失！難得適應了工作節奏，也慢慢找回生活步伐，偏偏公司發展不如理想，開始裁員。一起奮鬥的同事逐漸減少，Marketing部門只剩下Ryan一人，但他投入太多心血，捨不得離開，決心繼續拼博，深信能夠成功。
「最後梗係唔得啦！Startup有一個好大問題，就係財政不穩。因為理念吸引早期資本得以營運一年半載，但盈利未必能夠喺期間產生，好多投資者因而卻步，唔願意再冒險注資。我哋當時捱咗差唔多兩年，但公司發展遠遠不及英國，平台始終未能喺香港流通。投資者不再泵水，公司結業，我自然無咗份工。」他之後再投身另一間Startup，精挑細選，深入了解公司的發展前景，本以為可以闖一番事業，不出9個月又面臨同樣問題：財務不穩全面結束香港業務。
由29歲跌盪到32歲，他已有結婚打算，突然間失業令求婚及置業計劃暫時落空。「唉！現時打算搵返大公司，怕咗Startup喇。唔係唔好，幾辛苦我都唔怕，但首先要有份工先得。人生有好多計劃要實行，如果想結婚買樓生仔，工作嘅穩定性係一項重要考慮。目前我想搵返大公司，但可能前3年都係Startup，Pitch我嘅多數都係Startup，寄CV去大公司通常石沉大海。」
工作貨不對版 說好的大餅呢？
Mandy加入Startup大概9個月，原先是在國際服飾品牌集團工作，負責管理亞太地區的網絡銷售平台，因人工未能如期增加，工作內容沉悶，沒有成就感而打算轉工。因緣際會之下認識到新工作，公司原本在歐洲專營服飾批發的務業，現來港建立自己的零售業務。她的角色就是為公司開拓整個E-commerce市場，從零開始創造一番事業。公司人手頗多，約有30人，單單是E-commerce團隊也有4人，大家都等著她正式入職一起「打江山」。以上種種消息和認知均是來自公司的總經理！
抱着對未來的希望，她雄心壯志地來到新公司，結果發現貨不對版。首先E-commerce團隊只有1人，據說另外2人剛剛辭職，故索性留待Mandy親自請人。時至今日，她始終沒有請到人，「我都預左Startup無制度，好多嘢要自己摸索，所以冇期望過GM會俾啲咩指示我跟，一早諗好咗好多發展方向。即使入職後，遇到人手問題，我都冇有怕，最多自己OT多陣做耐啲。之不過，從來冇諗過我所有計劃都實行唔到。已經9個月啦，公司網頁的網店未架構好，Marketplace如天貓、HKTV等又未開到網店⋯⋯」
她的鬥志漸漸被消磨殆盡，原因有很多。一來是最基本的倉存問題未能解決；二來是商標問題未有注冊；三來公司政策朝令夕改，目標一周轉一個，同事無所適從，滿頭茫然⋯⋯「問題多到數唔晒。最重要係，我以為大家對E-commerce好重視，但事實很打臉，老細將E-commerce市場嘅排序擺得超低。即使我設了雙十一作為推出市面的最後限期，但老細情願延遲，只因為文宣唔夠華麗，要飛美國影多一次。唔使驚訝，係多一次，之前已經影咗一次啦！」現時她已心灰意冷，打算做夠一年做轉工，並且不再考慮Startup，以免重蹈覆轍。
問題天天都多 一個打十個⋯⋯
Irene的背景與上文兩位略為不同，中學年代便前往英國讀書，大學碩士畢業後回流返港，直接考獲了大型銀行的MT Program，經歷2年的訓練，成就一身好功夫，被上司看重，初時不斷升職加人工，後期漸進穩定，待遇沒有提升，但工作量就不斷增加。
「我喺銀行負責 Wholesale banking，要跑數，壓力好大，按步就班嘅情況之下，人工好難追平工作量。於是乎打算轉工，當時無特別指定想搵返銀行，定係咩大公司，有機會咩都想嘗試吓！結果經朋友介紹就入咗而家間公司，屬於新興金融平台，因為人工相較下非常之高，加上感覺具有挑戰性。便豁出去辭去鐵飯碗！」
結果呢，的確是巨大的挑戰，明明擔當的是CFO，但工作範圍遠不止於此，更有大量意想不到的事務。例如化身HR跟進招聘，處理產品研發，與第三方合作夥伴傾談合約⋯⋯「用1個人當10個人用咁形容自己，真係冇誇張。我甚至連Marketing都睇埋，跟攝影師同Designer傾宣傳圖，古唔古怪？原因係間公司得5個人，大家咩都要做，Title真係浮雲，每星期開完大會，大家就分工做嘢，完全唔會理你原本嘅職務係咩。」
她對工作的評語是：好壞參半。好的當然是接觸了大量新事物，最壞就是忙到沒有私人時間，24小時都處於工作狀態，而且似乎看不到成功的果實，永遠只有：做做做。如果重來一次，她說：「應該不會選擇Startup了。工時彈性，公司充滿活力，自主性大可以話事，但對比起佢嘅壞處，我都係接受唔到。嗰種要求我工作至上嘅態度，要將公司當成自己生意，長期犧牲私人時間去工作，唔係人人受到。有人得，有人唔得，我試過喇，先知原來自己頂唔順。」
甲之熊掌，乙之砒霜。每個人對於工作的追求都不同，有人事業心強、創造力強、自制力強，願意在未知的世界拼博，或許適合Startup。有人雖有事業心，但未必有創造力，反而在明確方向裡更能發揮潛能。除了追求，也要考慮實際問題，Startup的財政的而且確比較混亂，容易面臨倒閉危機。高風險高回報，下決定前謹記三思。
此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。
