如果你去過多啲唔同嘅地盤做過就會發覺,雖然個個地盤管理系統都有唔同,有啲重視安全多啲,有啲重視質量,有啲重視快(不過最重視都係賺錢),不過亦都大同小異。正常都有業主代表、顧問、大判同分判。
一個地盤裏面邊個最大?好簡單就係邊個俾錢就邊個最大,所以業主代表係地盤裏面正常係最大嘅,就算嗰個人嘅職位好低都可以好惡,有時會見到大判嘅經理要對最低級業主代表恭恭敬敬。如果遇到一個叻嘅業主代表經理可以令到整個項目好順利(廢嘅就調返轉啦)。
正常嚟講每個地盤嘅設計都係請建築設計公司設計晒所有建築結構同機電等等。為確保承建商按圖施工,加上最明白設計理念嘅一定係設計公司嘅人,所以正常情況下業主都會俾錢請顧問公司去地盤現場監工。佢哋主要嘅職責係確保按圖施工同施工質量。
基本上一切嘅地盤管理,都係由大判負責,包括總體施工計劃、質量管理、安全管理等等,所有都有大判組織協調。通常一個地盤裏面大判嘅管理人員亦都係最多,正常都有項目經理、工程師、機電工程師、項目協調員(PC)、安全主任、工料測量師(QS)、總管工(老總)、管工、地盤文員及其他行政人員等等。
其實分判都分好幾種。
首先講吓我最憎嗰隻,就係過河濕腳型,佢哋基本上成單工程接返嚟,之後就成單工程原裝打包再判俾人,之後唔參與任何管理。
另外一種就係專業分判,有啲功能性產品例如電梯、預應力等等。都係由產品供應商親自承包或供應商指定某幾個佢認可嘅承包商,所以佢哋嘅管理水平通常比較專業。
一般二判嘅管理體系通常都係大判嘅簡化版。佢地嘅現場管理多數都係由「打理」一腳踢。
三沙多數都係個老細自己有個十至幾十人嘅兄弟班就開始夾接工程嚟做,如果唔夠人就會再搵朋友搭朋友或蛇頭(專門介紹人)再搵夠數佢。三沙通常都冇乜管理可言,多數都係老細加自己啲親屬管理,不過佢哋通常都係工人或者工頭出身,所以佢哋就最知道現場啲嘢、做唔做到同埋諗方法去做到件事。
其實一個地盤閒閒哋幾百人多則幾千人,要一個人識晒所有管理係冇可能嘅,正常情況下就係上家去管理宏觀方面(整體工期等)嘅嘢,下家來管理微觀技術嘅嘢,一層一層落去解決問題(不過好多時都唔係),工程先會順利。
港夫.李澳
香港土生土長,近年來移居澳門,一個熱愛畫畫的地盤工程師。開立了facebook page「港澳小不同」,通過圖文來與人分享我心中所想。
此文章由原作者及Jobsdb HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及Jobsdb保留採取法律行動的權利。