地盤佬日誌-地盤都係無限開會
喺地盤做管理層成日開會係必不可少嘅工作。有時甚至朝九晚六馬拉從咁連開幾個會。我又簡單講吓有啲咩會同有咩特別。
業主會
大部份對地盤影響大嘅決定都係業主會上面決定。加上地盤金主（大業主代表）會參加嘅唯一例會，所以參加嘅人都會比較重視，會上你會見識到點解啲高層係高層，佢哋好多都可以一秒影帝上身，將一個直嘅故事講到係圓，都可以令到啲無深入研究個故事嘅人相信。
業主會前一日多數都有一個小型嘅email 大戰，其他六日嘅email加埋都唔一定比個一日多。開會前唔睇曬啲email 就好容易比對手一下棋就將軍，有啲人直頭會10:00開會，09:59先出email，係會上面對手話啲嘢好急，點解咁耐都唔回，就可以一野回話我開會前已經回咗你冇睇email咩？咁樣就可以喺業主代表心目中唔使扣分。
分判會
判頭會又名爛仔會，係大判定期叫曬所有判頭代表一齊開會，用處係大判可以一次過將最新情況同要求通知所有判頭，同埋比機會判頭同判頭之間在大判主持下溝通，不過爛仔會點解叫爛仔會多數就係因為判頭同判頭之間嘅溝通，因為話題多數都係A判頭話B判頭成日偷佢啲嘢（例如木枋、膠管等等），之後B判頭話A判頭阻佢做嘢要A判頭拆嘢佢先做到，C判頭又話D判頭做得慢C判頭要等佢做完先可以埋位做嘢。多數越講越火好快就粗口橫飛，初則口角繼而動武都係時有發生。
不過我都做過有啲地盤係管理得比較好加上爛仔會主持得比較公平，可以幾年間爛仔會上面都可以大概和平。
其他會
重有好多安全會、進度會、質量會、設計會等等，呢啲會有時可以好有用，但係有時候就只係遊花園。
港夫．李澳
香港土生土長，近年來移居澳門，一個熱愛畫畫的地盤工程師。開立了facebook page「港澳小不同」，通過圖文來與人分享我心中所想。
檢視此作者的所有文章
此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。
