雖然而家網上討論區啲工程佬好興講，如果有仔女一定唔建議佢做工程。老豆做工程行業，子女做工程行業嘅概率係會比較高的，但並唔一定。我自己老豆就係做工程做咗一世人。不過佢係做鬥木佬，我係做工程師。
有直接關係嘅影響
依家我哋呢一代已經少咗人子承父業，不過都有啲人係會子承父業嘅，例如係啲判頭如果個仔唔接手的話老一輩退休嗰陣時基本上間公司九成就要摺。另外有啲超細行頭（可能全行得幾個人）如果唔係子承父業都冇人入行。
另外直接關係一個就係介紹，因為工程呢一行入行嗰陣時跟嗰個師傅如果手勢好的話係會一世就用，所以有啲工程老一輩如果見到啲仔女讀書唔成或者係畢業嗰陣時做咗啲冇乜前途嘅牛工，就會嘗試介紹佢哋入返工程咁啲好嘅師傅或者公司。
另外，有啲工程行頭講冇人介紹就好難入行，嗰啲就真係好多時成行啲人都有屋企人係做工程㗎。
無直接關係嘅影響
有陣時一個人入邊行同佢嗰個人認知都好有關係，有時如果小朋友親戚朋友裏面完全冇人係做工程，喺中學畢業去大學選科嗰陣時會選工程嘅機會率係比較低。另外就係社會地位問題，如果俾個無工程的朋友嘅人任佢揀讀工商管理定係讀土木工程，正常點都係幻想著西裝打呔出入中環甲級寫字樓嘅工商管理，點都好過成日要行地盤一腳泥工作環境汙糟邋遢嘅土木工程師唔會。
所以如果有屋企人係做工程嘅話，對工程行業不瞭解會比其他人多少少，最起碼大概會知道工程界人工係如何，間接令到入行嘅機會高咗。
根據我自己非正式統計，我啲工程界朋友八成未入行之前已經同工程界有啲淵源。雖然過程環境差工作辛苦，但係如果對於冇家底冇背景讀書唔係最叻的話工程都係一個選擇。
港夫．李澳
此文章由原作者及JobsDB HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及JobsDB保留採取法律行動的權利。
