地盤佬日誌——樓係點起？
你地有無覺得多數啲空地都放好多年唔起樓，之後終於起嘢啦，不過幾年都唔知佢起咗啲咩(打樁+起地庫)，但係突然好快又成幢樓起咗？
起樓流程
第一步：打樁
多數起樓第一件事就係打樁，但係都唔一定每幢樓都會打樁，兩三層高的樓好多時都唔使打樁因為屋底的泥土受力都足夠承受成幢樓。高樓大廈就一定要打樁嗎？都唔一定㗎﹗試過有層幾十層嘅樓因為石層比地庫低高可以直接坐喺石度，所以基本上都唔使打樁(有機會因為風力要打抗拉樁）。打樁對起樓嘅成本有好大嘅影響，因為如果石層喺深處嘅地方可能一幢樓要用幾億，但係石層淺就可能好平好快搞得掂。
第二步：起地庫（可skip）
其實香港好多樓都唔興起地庫，因為一來地庫嘅通風採光都係做得唔好，之後做維護都比較麻煩﹔二來起地庫係好貴同用好多工期，例如起三層地庫：開挖加結構比起上面20層樓嘅時間同錢都可能仲要多，所以除非係用盡地積比或要同地鐵相連等等理由之外，好少會有人想起地庫。
Jobsdb「引才法則」調查報告顯示，建造及建築界人才最重視以下工作因素﹗立即click入以下圖片睇更多該行業之打工新趨勢﹗
第三步：樓宇結構
香港多數嘅樓都係高樓大廈，但係唔似外國多數高樓大廈都係鋼結構，香港多數都係鋼筋混凝土結構，原因係鋼筋混凝土結構比鋼結構平唔少。不過起鋼筋混凝土結構有個好先決嘅條件喺越發達嘅國家越就難得到嘅，就係要有足夠嘅釘板佬紮鐵佬，釘板扎鐵實在太辛苦，所以越發達嘅國家越少人會入行。
立即搜索熱門新工
第四步：裝修階段
係幢樓起完結構後大約要用1至2年時間裝修。
基本上每幢樓嘅成本最大嘅差距就係呢度啦。我試過同時間起二個地盤面積同樓高都係差唔多嘅樓盤，不過建築費就差左幾倍，純粹係因為一個係豪裝另外一個係基本公屋裝修。
最後等政府部門驗收（驗消防，出入夥紙等）之後就可以入住。
港夫．李澳
香港土生土長，近年來移居澳門，一個熱愛畫畫的地盤工程師。開立了facebook page「港澳小不同」，通過圖文來與人分享我心中所想。
檢視此作者的所有文章
此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。
