地盤佬日誌—裝修佬/地盤佬

究竟裝修佬同地盤佬有咩分別呢?其實有啲裝修佬可以轉做地盤佬,地盤佬都可以轉做裝修佬,不過佢哋都真係有啲唔同,等我簡單地介紹下啦(純屬個人認知) 。

▪ 搬屋師傅見盡劏房、豪宅及共居生態:「搬屋多因加租或就返工。」

▪ 地盤佬日誌:地盤移動

咩係裝修佬?

其實地盤裏面都有裝修佬嘅(做裝修嘅咪就係裝修佬囉),不過我呢度要介紹嘅主要係做啲小型住宅裝修之類嘅裝修佬。

技能上:多數嘅裝修佬都係周身刀,一個師傅好多時都識做三幾樣工序例如:有時同一個師傅會由打拆泥水到油漆一路都係佢。有時幾個兄弟班就接個住宅裝修來做,到咗個個都唔識嘅工序如搭棚先會再盤出去搵其他人做。

衣着上:呢啲小型裝修通常都冇特定嘅衣着,安全啲嘅師傅就會着返對安全鞋,反光衣就基本上係冇人着的(因為係室內真係冇乜用),安全帽就都係冇咩人用,不過佢哋會用報紙接個四方形嘅紙帽來帶(我見我老竇以前開工都有帶,我估係唔想啲頭髮污糟掛)。佢哋多數都有套開工衫(污糟衫),之後放工就會換返乾淨衫。

▪ 【工傷索償】工程、建造業界遇事故claim賠償必要清楚的事項

▪ 吊船操作員:每日努力面對 「高」人一等的工作挑戰

咩係地盤佬?

技能上:因為流水作業程序同埋專業分判制度,令到好多師傅都好長時期做返同一樣工序,咁樣令到好多師傅都只係專長係一兩個工種裏面(當然有啲師傅係乜都識㗎啦),咁樣嘅好處係佢哋所做嘅工作都會好專業同埋做得好快。唔好處就係同一個位置可能有幾十個人經手。

衣着上:因為基本上大部份地盤都係有大公司承接再分判出去,所以安全功課會做足,唔使講㗎啦最基本嘅安全三寶(安全帽反光衣安全鞋)都係必須嘅。

順道講下啲私人嘢啦,我老竇以前好長時期都係做一個裝修佬,主要係做木器不過後尾因為香港木器比大陸啲傢俬廠逐漸取代左變咗冇乜工開,之後有段時間走咗去做船廠不過船廠好快又俾政府收咗嚟起迪士尼,最後60幾歲先走去轉做地盤度做雜工,有時職業嘅際遇都好受大時代大氣候嘅影響,依家佢間唔中都會笑下我子承父業。

港夫.李澳
香港土生土長,近年來移居澳門,一個熱愛畫畫的地盤工程師。開立了facebook page「港澳小不同」,通過圖文來與人分享我心中所想。

檢視此作者的所有文章
 

延伸閱讀:

地盤佬日誌:老行尊定老屎忽?

地盤佬日誌──社會地位

地盤佬日誌—大白象

 

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

 

The most-talked about topics 

Scroll to Top