大學生兼職攻略—Reg科砌好時間表 熱門炒散位、百元時薪政府工 搵啱就返

FacebookWhatsAppTelegramEmailCopy Link

大學生兼職攻略—Reg科砌好時間表 熱門炒散位、百元時薪政府工 搵啱就返

「係咩驅使你返學都要返工啊?」「係窮啊~」「大學五件事」一定不少得返兼職,U life可以話係整個讀書生涯最free嘅時間,大部份大學生都一定會返part-time,可能係因為窮想要多賺零用,又或者係想累積更多工作經驗。不過有時想返工,都要配合天時地理人和先,畢竟大家仲要返學,唔想兼顧唔到搞到一鑊泡,就要留意以下10個大學生返part-time嘅貼士啦﹗

1.Reg科排timetable:揀咩時間嘅堂比較容易返兼職?

由reg科嗰刻已經決定咗你成個sem嘅「錢途」,所以reg科嗰陣最好安排到有至少一日day off,咁就要以「盡可能將啲堂集中埋同一日或者同一日入面最接近嘅時間」為目標,面對有啲set好咗嘅堂,swap科就要揀返啲喺最早嗰堂之上,或者最尾嗰堂之下,又或者可以塞靚天地堂嗰窿嘅時間,咁就可以唧出多啲時間喺day off或者課餘時間返part-time啦﹗

2.遇到天地堂點算好?

如果真係reg到天地堂都唔緊要,可以當佢係一個「study break」。平時返工返學,無咩時間顧讀書嘅,遇著天地堂,反正喺學校,可以去做吓嚟緊要交嘅assignment、presentation等等,有問題搵professor都快啲,咁平時去返工都唔使擔心做唔切啦。如果sem頭好得閒無嘢做,不妨利用天地堂嘅時間幫人補習,補習夠曬flexible,可以視乎你天地堂嘅空檔,補返兩/三個鐘又得,時薪又高,搵個近學校附近嘅學生,逢天地堂去補習就唔使hea咗啲時間又有錢賺,咁就無懼天地堂啦。

3.Day off+weekend安排

Day off、weekend放假係返工嘅好機會,但仲要處理學業點算好?建議要做好work-study balance,Plan A:趁放假返長啲或者返full day嘅shift賺多啲,咁返學嘅日子就可以抖吓,留嚟處理功課同溫書;Plan B:將啲假斬開一半—一半返工一半讀書。總言之,要好好分配放假嘅時間,咁就唔洗「返得工嚟無咗個GPA,GPA返返嚟銀包卻又唔爭氣」﹗尤其係assignment、mid-term同final呢啲period就要自己因應返時間返少啲工啦。

▪【周末兼職達人】係咩驅使佢星期六日都兼職?炒散Event Helper做足十幾年

4.大學生最啱揀咩part-time?

搞掂timetable後應該要揀咩工呢?好多人會問咩工最啱大學生返?其實最啱大學生返嘅工好難定義,因為「最啱」係要視乎你「最想得到啲咩」,例如你想體驗生活,想返啲對將來份工有用嘅part-time,想賺最多嘅錢等等……所以喺搵part-time前,最緊要問清自己:究竟我想透過part-time得到乜嘢?然後就會搵到最啱你嘅工。

5.揀工有咩要注意?

揀工除咗要睇自己最想得到咩之外,其實大學生返工最大嘅限制係空暇時間唔多,所以喺選擇part-time嘅時候要注意邊啲工有最少工作時數限制,例如不少飲食行業waiter/waitress、品牌sales、Office文員咁都會要求part-time每星期最少返18個鐘或最少有三至四個工作天。所以要睇返自己可以返工嘅時間搵啲返工時間flexible啲嘅工作,返唔到就唔好夾硬嚟走堂返工啦,想返工以後有排你返啊﹗

▪ 餐飲界炒散空缺

▪ 乞客:5個和廚房大佬相處的感動回憶

// //
//

6.做咩兼職較flexible?

想搵flexible嘅part-time job嘅話選擇都唔少,例如可以home office嘅freelance job,多數都係文書類工作,例如打字幕等嘅資料輸入job、寫稿、translate文件等等,又或者有啲media類嘅工會搵人剪片或者管理social media專頁,呢類工仲可以喺你遇著天地堂果陣做添﹗另外就係「炒散」,酒店炒散、展覽炒散咩都有,你唔需要固定地返工,返幾多由你決定,只要搵到個好嘅中介,逐個星期報更就ok。

▪各大公司招請嘅兼職小編空缺

7.咩工最賺錢?

最搵到錢嘅「百元時薪part-time」多數同政府有關,例如政府每年DSE前夕都會請閱卷員、報到室主管、監考員同口試主考員,每節4個鐘,平均時薪有$130,工作又簡單,都係點吓名、維持秩序等,所以都幾筍㗎!仲有政府統計處會請兼職訪問員,時薪有$101,不過就要求申請人要DSE或會考5科合格,同埋要外勤工作。以上呢啲筍工就唔係成日有,如果想長期返part-time嘅,而你又有一技之長,例如鋼琴、畫畫、跳舞等等,不妨考慮做私人導師,呢類工作同私補性質相似,甚至比私補高人工,可以俾你邊發展自己嘅興趣邊賺錢。

8.Sem-break空檔用嚟chur盡返工?

除咗day off返工,仲可以好好利用sem-break嘅時間搵真銀,sem-break話曬都有一兩個月咁長,所以唔少人都會chur盡佢賺多啲零用。但難得有段長假期,建議大家可以搵啲intern做,既可以整靚自己份CV,又可以當part-time咁賺錢,與其純粹為賺錢,不如儲啲工作經驗。

9.有咩工可以趁Sem-break賺多啲外快?

Winter break多數都會有唔少筍工,因為接近聖誕同新年假期,唔少公司都會比較忙或者舉辦大量活動,呢個時候就需要大量人手,多數會高薪請人,例如一些商場活動helper、品牌shop assistant等等,時薪$60-$70起計。另外係summer break,呢個break放足三個月咁耐,真係咩工都可以試吓返,當見吓世面。又或者可以用難得嘅長假嚟返intern,不過大家都知intern係「廉價勞工」,人工並唔高,但如果你將來對投身政府工有興趣,可以試吓報政府嘅intern或者暑期工。每年3月左右政府各個部門就會請人,人工仲唔錯,賺錢之餘又可以累積政府工經驗,一舉兩得。

▪熱門Event Helper空缺,召喚緊你﹗

10.論Time management 重要性

讀u時間係多咗,但多嘢做咗。生活係free咗,但就好考你嘅time management,要做好佢首先要自律同自制。建議可以由寫schedule book開始,將學業同工作嘅時間好好分配,然後跟住嚟執行。例如可以mark低曬啲quiz、交report、mid-term嘅重要日子先,咁就方便你之後預時間返part-time,邊日要提早完成功課先等等。學識點樣分配時間,養成良好嘅習慣,一切就掌握喺你手中啦!

總結:過緊大學生涯嘅你要記得返學初衷係為咗學習,唔係為咗賺錢﹔真係搵錢,日後投身社會時再慢慢搵﹗要好好享受校園生活,兼職生涯只係為你帶嚟除讀書以外嘅另一種生活體驗及額外收入,係唔長唔短嘅大學生涯裡面,要學識獨立管理好自己嘅生活同學業,懂得權衡利弊去做事,先係重要課題。

 

 此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

Increase your chances of getting hired. Create a jobsDB profile

Increase your chances of getting hired. Update your jobsDB profile

想收到更多JobsDB最新職場資訊?

熱門文章
近年做工程嗰啲文件真係一日比一日多。聽講幾十年前嘅地盤,係由頭到尾都唔多文件,但而家閒閒哋一支樓仔都可以出幾千份文件。基本上,將啲文件攤開佢嘅話,面積好可能會大過總樓面面積。 主要建築文件的分類 首先,所有建築都先要有探土丶周邊環境/限制的文件、比設計師們做佢哋嘅設計圖、做各種計算(GFA力學風量排水量等等),以及其他對政府同埋發展商嘅文件。之後就到工料測量師們計返嗰樣嘢嘅工程量用嚟做合約。然後到承建商同埋分判入場,開始要入返啲進度計劃、施工方案、材料報批、風險評估、施工深化圖等等一系列嘅文件。再之後就係一系列嘅業主、設計、承建、分判相互間嘅信來信住,包括你話我慢、我又話你阻住我、我又話你增加咗嘢要加錢、你又話我整爛你啲嘢要扣錢等等,同埋仲有好多測試文件、做完嘅驗收文件。 文件的用處 呢個世界上,每樣嘢存在都有佢嘅意義。雖然好多地盤人覺得好多文件都好廢,但係佢哋(文件)都有佢嘅用處。由初期嘅建築大綱,到慢慢細化每樣嘢,先令到呢個建築物從大方向去到每一個細位都能夠合理地興建出嚟。 ▪ 地盤佬日誌—地盤最重視嘅節日 ▪ 地盤佬日誌—好判頭&好騙頭 冇實際作用的文件...
打工仔常說:「在辦公室裏做人比工作更難啊!」若不幸遇到職場欺凌,大部分打工仔也會選擇啞忍或辭職。香港教育專業人員協會在今年2月以電郵向超過一千名教師進行調查,發現過半受訪者在過去六個月內,也在學校遭遇過一次或以上的職場欺凌,例如言語的攻擊、冷嘲熱諷、在背後中傷、上司不停打壓,甚至給過量不合理的工作等等。 這些只是冰山一角,欺凌問題充斥在各行各業。作為打工仔的你該如何應對呢?直接與欺凌者對話,背後的說三道四者,就最怕光明正大的擺上枱面?記錄所有「罪證」,若將來要向公司投訴或訴諸法庭時,這些證據也會成為呈堂証供?與人傾訴和嘗試磨合後也解決不了,那就訴諸投訴機制:工會、勞工、勞工組織和法律援助,都是你的武器?千萬別採取極端招數報復,也不要怪責和否定自己?以下為你詳細解說面對職場欺凌的Dos & Don’ts! 遇到職場欺凌你要做的事 1. 直接與欺凌者對話 愈早發聲,就可避免自己成為「長期攻擊」的對象,這是最關鍵亦最難行的一步,但只要有勇氣踏出這一步,就好大機會可解決問題。要知道如果你愈是忍氣吞聲,欺凌者就會變本加厲。所以當你注意到你受到欺凌時,在情況許可下,可作出即時回應。 例如同事經常要你去幫忙做自己工作範圍以外的事,你可禮貌地說:「不」。幫得一次,他就會繼續找你麻煩;若果你的拒絕令到他說更多難聽的說話,甚至作出人身攻擊,你就要直接說出你的感受,例如:「我無法幫你處理你的工作,但亦請你停止你帶有侮辱性的說話。」很多時候欺凌者會以「開玩笑」作為藉口,或者笑你「唔玩得」,此時你亦可以直接說出你真實的感受:「對啊,我不認為可以這樣開玩笑,希望你能尊重我。」說話時亦要注意自己的姿體語言,挺起胸膛抬起頭地顯露自己的自信。 很多時候欺凌者就是看準被欺凌者的懦弱,透過打敗別人來獲取成功感。若你能自信地回應他的冷嘲熱諷,一來他不會預計到你「原來」懂得反抗,能殺他一個措手不及。二來,每次你也正面反擊,他不能獲得成功感,漸漸便會失去攻擊你的興趣。...
If you have attended job interviews, you would know that...

十大熱門搜尋

Scroll to Top

Processing, please wait…