乞客：餐飲同事射波遲到之神奇理由

好多人都會突然之間心血來潮地唔想返工（或者有啲人日日都唔想啦吓），就會求其編個藉口出嚟射波。而喺餐飲行業，呢啲足球小將更多，因為好多餐廳長期請唔夠長工，變相兼職同炒散員工分分鐘多過長工，而兼職同炒散射波又唔需要假紙同扣糧，所以射波機會率都幾高。

Mary做咗餐飲咁多年，地鐵塞車呀、通宵玩後即日急性發燒呀、長期感冒菌入腦呀⋯⋯呢啲搞笑得嚟又明知係大話嘅射波理由已經見怪不怪。除此之外，我仲聽過同事用一啲勁無邏輯嘅神奇理由作為射波或遲到嘅藉口，今次就同大家分享一下：

1. 喺Lift入面拗柴

話說某位女同事本身需要返夜更6點鐘，嗰晚6點鐘佢喺Group Message入面話會遲半個鐘，之後到6點半都未見人影，經理打畀佢問佢去到邊，佢答話搭緊Lift上緊嚟。

直到7點鐘，佢突然再喺Group度話：「我喺公司附近拗柴，而家企唔到，今日唔返。Sorry！」 我同同事都笑到抽筋，搭Lift搭半個鐘都算，是咪喺架Lift入面知道要返工，好興奮要跳返Part舞賀吓先，所以搞到拗柴呢？最重要嘅係，佢第二日係無事照常返工，可以喺一日之內痊癒。我哋都讚呢位同事厲害，真係有啲跳舞底子㗎喎。

2. 阿爺突然生日要唱K

某位男同事喺佢應該返緊工嘅時候不見蹤影，我經理馬上狂Message搵佢，但位男同事無覆。過咗一陣無咁忙嘅時候，我經理就打電話畀位男同事，點知係一個女仔好開心咁聽電話，話：「喂？阿 XX喺廁所『劏』緊喎，邊位搵佢？」背景係勁嘈音樂嘅K房聲。

結果第二日先收到位男同事嘅Message話：「對唔住呀各位，尋晚阿爺生日食飯一定要去。」 哇，而家啲阿爺咁潮，生日要去唱K，仲要玩到你「劏」 。不過你阿爺搞生日飯你唔係一早知嘅咩，咁你又畀更？是咪玩嘢？

3. 個頭Gel耐咗

話說某日公司搞Event，需要一眾返工同事執正少少個儀容。到Event開始入客嘅時候，都仲未見某名男同事現身，經理同其他同事都打晒鑼咁搵佢，但未見回覆。一個鐘頭之後⋯⋯該名男同事華麗現身，一身MK日系Gel頭Look⋯⋯講咗句：「Sor，Gel頭Gel遲咗。」

當眾多流晒汗、炒緊場嘅同事準備同佢開波之時，男同事講多句：「你估我想嘅咩！係你哋話執正啲吖嘛！我咪Gel耐咗囉！」聽到我哋十萬個無奈。

4. 阿媽唔畀我返工，叫我留喺屋企

呢位男同事本身畀更已經唔多，一星期得一兩日。話說某日本來已經有另外兩位同事請咗假，到差不多開午市嘅時候，呢位男同事突然喺Group度話：「Sorry，今日返唔到。」我哋當然問佢咩事要射波啦。佢回覆：「Er⋯⋯我今日唔係好方便。」 吓？你嚟M呀？咩唔方便呀大佬！真係佛都有火。

之後佢再補充話：「我阿媽發脾氣話唔畀我返，今日要留喺屋企陪佢。」我哋心諗大人大姐，你自己做人有少少責任感得唔得？如果今日真係有重要事做，你阿媽應該提早同你講叫你咪畀更啦。

最好笑嘅係，之後有同事話返畀我哋知，原來佢喺Facebook被人Tag佢當日去咗手作市集。真係若要人不知，唔好太低B。

其實呢，炒散唔想返工嘅話，講句「私人理由／屋企有事」已經好夠；長工有醫生紙的話，都唔會再追問落去。所以，作埋晒一啲無厘頭藉口只係盞畀人笑你蕃薯。

不過大家都要記住，射得多波終遇虎。因為而家餐廳好多都係得一個人睇一個Section（大概8-10張枱），少一個人就即係另一位同事幫你睇埋嗰8張枱，Weekend仲要翻2-3轉都咪話唔傷身呀。我唔排除有啲人真係有突發事需要請假，但三番四次都到On floor嗰陣先話你唔返，呢種行為真係十級自私同不該。如果真係預咗自己會射波，不如早一啲同人講，等人及早搵定後備頂你個位吖嘛。

雖然話而家餐飲業有手有腳都會請，不過呢啲咁唔負責任，視同事生死於不顧嘅人，如果係炒散的話，畀更一定會畀人排到最後，甚至無得返；長工就真係好快畀人炒魷魚㗎啦。所以，好自為之呀各位專業嘅足球小將。

此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。