地盤佬日誌-合作關係

地盤係一個好多人嘅地方，除咗大家玩香蕉皮之外，都有好多合作關係。合作得好就大家好。

上下家合作

正常工程都係上家出圖比下家施工用，十單裏面十單判頭都一定搵到啲位係好傻仔，即係施工上好難做。之後判頭多數會出個反建議，多數都係平咗快咗但係質素會差啲。多數上家都係睇重質素，下家係睇重價錢（標價不變），不過大家所有人嘅共同目標都係快手起貨。

▪ 地盤佬日誌—停工

▪ 地盤佬日誌—風水輪流轉

同行合作

同行啲老細雖然都係同行如敵國，不過敵對時主要係投標個時，其它時候好多時都可以係朋友，同行好多時可以救你一命。例如你無工開時有機會其他同行食唔曬可以判啲野比你做，你賣多賣少咗材料時可以我賣啲比你、你賣啲比我。有時有啲位自己唔知點做，都可以搵啲友好同行傾下計，有機會傾傾下就有方向。

其他行家合作

一個地盤有幾十個行頭，大家都係合作關係，有啲合作得多啲例如結構孖寶釘板紥鐵（不通都打交打得多）。

多行頭合作做得好唔好第一要睇大判安排得好唔好，安排得差幾個行頭同一個位一齊做嘢就一定打交（大判正常發揮）。之後現場都好多野都要大家夾好，如果唔係要好易你做完之後我落唔到手做，第二日就有野爛咗，咁樣又打交啦。

▪ 地盤佬日誌- 高人工傳說

做工程從來都係人同人合作完成，行業來講話大唔大話細唔細，如果大家都唔轉行大家可以每幾年就見一見，幾十年之後又對返同一班人。做野大家都係為求財，多個朋友點都好過多一個MMA（綜合格鬥）對手。

港夫．李澳

香港土生土長，近年來移居澳門，一個熱愛畫畫的地盤工程師。開立了facebook page「港澳小不同」，通過圖文來與人分享我心中所想。

檢視此作者的所有文章 

此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。