一個地盤裏面嘅權力分布有時重複雜過權力遊戲，又等我簡單介紹一下。
職位上的大
項目經理（PM）-理論上大判喺地盤入面最大嗰個就係項目經理，理論上佢係最惡最大嘅，不過佢都要平衡成個地盤嘅安全質量進度，做嘢相對地其實係多掣肘 。
總管工（老總）
大判喺地盤放喺現場最大嗰個，判頭要放材料上料上樓放架部都有問過佢。我自己認為喺現場嘅地位佢係最高㗎。
▪ 地盤佬日誌—風水輪流轉
▪ 地盤佬日誌—工作與生活平衡
工程師
其實只係文件雜工，實際冇乜權力。
工料測量師（QS）
表面上判頭有冇糧出都係睇佢，不過其實好多時都係PM背後控制。
皇家佬（Inspector）
多數其實職位唔係好高，但係有掌握質量合唔合格把尺把尚方寶劍，所以某程度上係地盤裏面係行路有風，冇咩人夠膽得罪。
安全佬
因為其實每個工序都有危險，所以安全佬喺地盤嘅基本職責都係鬧啲地盤佬，有啲人以為安全佬有叫停工呢一把尚方寶劍，不過其實九成九都冇嘅純粹得個講字 。
▪ 地盤佬日誌—工程師的前途及錢途
▪ 地盤佬日誌—入地盤做慢慢學到的奇妙特殊技能
天秤手
天秤手喺起結構期間基本上都係地盤嘅王者，樓面上面幾百個地盤冇人夠膽得罪佢，傳說中行規叫天秤手吊野一定要加個 “X哥”，佢哋嘅師傅教落聽唔到嗰哥字就唔可以幫人吊嘢。
𨋢姐
如果你想睇會地盤佬嘅溫柔，你可以試吓行入地盤嘅工人籠（工人電梯），人人都會對𨋢姐關懷備至，我夠膽講分分鐘你搵個香港小姐行入地盤都未必有𨋢姐咁受愛戴，我都係時候要加返句：香港小姐邊有𨋢姐咁靚。
邊個出糧俾你先係最大
其實對於你來講一定係你老細最大，佢唔出糧俾你你就行咗出地盤，上面嗰班人全部對你來講就係Nobody。總之就係有汗出有糧出最緊要。
港夫．李澳
香港土生土長，近年來移居澳門，一個熱愛畫畫的地盤工程師。開立了facebook page「港澳小不同」，通過圖文來與人分享我心中所想。
檢視此作者的所有文章
此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。
