地盤佬日誌-越做越掂／霉？

喺呢行裏面唔經唔覺都打滾左十幾年，見識到嘅前輩後輩同行行家都唔少。有啲人越做越掂，但係有人越做越霉。 

▪ 地盤佬日誌- 地盤佬點搵工

▪ 地盤佬日誌—風水輪流轉

越做越掂 

通常見啲口靚仔同佢夾完頭幾次就會知個口靚仔有冇前途，因為有啲人真係醒啲學嘢快啲轉數快啲做嘢有責任感啲又勤力啲，通常呢啲叻仔過幾年之後再見佢個職位同地位都會高咗好多。不過有時都會睇錯，有陣時有啲靚仔一開始好有誠意去做，但係做吓做吓越嚟越冇誠意越嚟越得過且過，慢慢就從一個天之驕子變返一個普通人。亦都見過有啲係遇人不淑，跟着個唔好手勢嘅老細／上司，最後正經嘢學唔到淨係學到一大堆旁門左道嘢，最終就奶一鑊大嘅。 

但係如果一開始識佢已經係三四十歲嘅人就多數比較平穩，都有啲係你識佢嗰陣時係叻仔嘅一路叻仔繼續坐火箭咁樣升職，廢廢地嘅就繼續廢廢地可能十幾年後見佢都係一樣同一個位。 

▪ 地盤佬日誌- 高人工傳說

▪ 地盤佬日誌—工作與生活平衡

越做越霉 

多數我見到越做越霉嘅通常都係判頭老細，有部份係唔與時並進，有啲係幾十年來一直鍾意用啲文件唔齊老鼠貨慢慢走啲大盤全部唔用佢。有啲係長年跟咗個唔好嘅上家長年都餓又餓唔死發又發唔起之後就越做越頹。有啲係因為本身個人太好人養咗一班老員工，但係嗰班老員工又係廢柴。 師傅我就冇乜點見真係越做越霉，可能連我都頂唔順嗰啲都已經離開咗呢一行。 

你係黃金的話就算而家未有俾人發掘出嚟終有一日都會發光發亮，你係廢柴呀就算俾你因為天時地利上到位都總有一日會跌返落嚟。 

港夫．李澳

香港土生土長，近年來移居澳門，一個熱愛畫畫的地盤工程師。開立了facebook page「港澳小不同」，通過圖文來與人分享我心中所想。

檢視此作者的所有文章 

此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。