我打過好多份工,屈指一算,由中學開始,而家間公司已經係我做過嘅第12間公司。每份工都會令人成長,Year 1 暑假經朋友介紹,我去咗間強積金Trustee做Customer service representative,聽電話解答客人強積金問題。做之前我對MPF一無所知,公司就安排我上一個月有人工嘅Training。
※※※
如是者,一個月後終於實戰...
一般查詢好似改地址,教個客點轉基金,轉錯咗點轉返啱,我都應付自如。但另類查詢先係份工嘅highlights。
1. 「我撳來撳去都搵唔到你哋架.... 」
我明,我真係明。我打去第二間公司都係咁,啲公司就係想你搵唔到佢。既然輪到你,唔好嘥時間,come on,開波講野啦。
2. 「你解釋吓,點解我一轉過來,『你』就蝕咗我咁多錢....」
啲錢唔係「我」蝕咗你架,投資涉及風險,基金價格真係可升可跌。轉過來嗰時個市差,喺舊Trustee 蝕賣,喺新Trustee 高價買入,而家個市又跌,就會造成損失。um… 簡單來講,你比較不幸囉 (今次當畀錢交學費,下次做個精明嘅消費者啦)。
3. 「老闆拖欠咗我幾年強積金,求吓你幫吓我啦...」
冤有頭債有主,我哋唔負責追數架。強積金都係你份糧,拖咗幾年糧仲幫佢打工?真係可憐之人必有可恨之處,做人不要太ATV啦。
4. 「我唔理,我要拎返啲錢出來...」
佢啲口吻真係同梅媽無分別。「先生,強積金條例只有以下情況先可以拎返啲錢出來,包括提早退休﹑永久離開香港﹑戶口少過5000蚊而你決定以後唔做野﹑喪失行為能力﹑有絕症﹑同埋身故」。
「死咗點拎呀,X」 ,佢黐線得來連常識都無,「會變遺產囉,先生」。Feel 到佢想好似貞子咁,由個電話爬入來殺死我,但事實係咁呀嘛。
5. 「叫你manager 聽,我要投訴你...」
我同情你蝕強積金,見到自己份糧煙消雲散係會失去理智嘅。搵manager?好啊,但我manager 都只會重覆講一次「你真係蝕咗錢」。
※※※
有人因為cut 唔到電訊公司服務而失控。蝕咗佢啲強積金,個客係好似《家有喜事》李香琴無得睇電視一樣,「世界末日啦」。對住一群面對世界末日嘅客,我嘅Job duty 就係「俾人問候我」,修養同EQ當然提升啦。曾經接過一個就退休嘅客電話,佢份強積金蝕咗20 萬,佢不停問侯我媽媽,仲食帶咁大叫「廢柴...廢柴...廢柴...」,頻率同keroro產生共鳴一樣。
我往後再無做過聽電話嘅工...
呢份客戶服務員嘅工好似幾好笑,但當時返工真係有「日日上路」嘅感覺,尋日俾人鬧完廢柴,心情未平伏,今日又再「上路」。造成「日日上路」嘅悲劇,全因我唔了解份工嘅Job requirements ,朋友介紹,迷濛濛返一份唔適合我嘅工。
啱啱退休嘅莊偉忠話佢成世打過14份工。每份工係唔同嘅體驗,我呢啲「唔知想做咩」嘅人,每份工都令我知道,下次搵工應該eliminate 唔適合嘅工種。認真審視份工嘅requirement,就走少好多冤枉路。
PS. 啱啱我喺Jobsdb search 當年呢份暑期工仲存唔存在,發現佢仲請緊。Job ad requirements 寫住positive minded,passion in customer services,如果當年有認真睇,了解自己嘅興趣同能力,可能我唔會apply,但如果唔係特訓3個月,我點會知如何減低強積金喺逆市中招致嘅損失呢?
延伸閱讀:
此文章由原作者及Jobsdb HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及Jobsdb保留採取法律行動的權利。