從亞視做到大台， 現職編劇被問收入坦言：「你都估到一定好少﹗」

一套電視劇如何誕生？現職編劇話你知。

「老土講句，今時今日喺香港做編劇，就要有買唔到樓、結唔到婚嘅心思準備！」現職大台編劇的Roy直言。他曾在已結業的亞視、網台、電台工作，做過不同劇種的編劇，行業浮浮沉沉，始終未影響他繼續寫的心。

入行門檻不太高

Roy入行的經歷很簡單，讀書成績不算好，三大不入，勉勉強強升讀某學院（當年還未算大學）的傳理系。電視撈飯長大，同學大多選讀商科，他完全沒有興趣，唯一想做和能做的便是：作故仔。傳理畢業後，理所當然地進入傳媒行業。「我讀書時，便寫些小劇本，期間不斷參加坊間的劇本或小說創作比賽，但從來無拎過獎。哈哈！當年畢業時，電視行業相對景氣，亞視還存在，每個台我都寫CV連同曾經寫過嘅劇本寄過去，最後加入了亞視，雖然人工低到爆，但叫入咗行。」

他表示，雖然現時香港電視、電影行業萎縮，但電視台、電台仍不時招聘編劇，因行業前景不明朗，和人工低等事實，流失率頗高。入行門檻不高，絕不要求學歷有多高，多數只要求職者有熱誠、喜愛創作。「要入行，就要主動長期留意心儀公司個網，編劇呢類工較少擺上求職網站，多數只會刊登喺返佢哋個網。最好寫定、諗定好多故仔，每間公司面試內容都唔同，但好多都有討論環節，累積嘅故事愈多，愈幫到自己脫穎而出！」

編劇的兩大類別

初初入行，Roy其實沒機會接觸故事創作，工作內容反而是資料搜集，誰叫他進入的是綜藝節目劇組呀！（苦笑）「編劇通常分為兩大類，一是戲劇節目組，即係大家認知中，為《開心速遞》寫劇本的編劇。二係綜藝節目組，雖然職銜都叫編劇，但實際卻是資料撰稿，工作多數係校對、拼貼，無咩創作空間。」雖然兩者的工作內容都是處理文字，稿件，但成就感和趣味度就大為不同，他在累積了一定的經驗和人脈之後，便轉往其他公司，渴望找到更多創作空間，最終如願投身大台，正式成為戲劇組的編劇。

▪ 會計仔：邊個夠我嚟？錢途篇

▪ 要錢定要命？香港八個傷身職業

一套劇的誕生流程

平時看劇看得多，編劇在背後擔當什麼角色呢？Roy解畫，一套電視劇多數有5個編劇，但實際人數視乎劇集的製作班底和成本。劇集愈長，成本預算愈大，所需編劇人數愈多，反之亦然。相反，電影通常就只有一個編劇來主導。他深入說明：「電視圈編劇又分為兩個層面，一係大佬編審，二係大佬啲下屬，即係我呢種普通編劇啦！編審主導整個故仔，統一套劇風格，改編劇啲稿，決定所有嘢。而編劇呢，除了寫稿，還要做資料搜集、賣橋、協助編審及提出意見等。」

簡單而言，劇集誕生前主要分為三個流程。先是有一個主題，從主題出發構思故事大綱；再是有一個明確故仔，人物關係圖確立，深化人物性格等；接著是訂好分場，使劇情邏輯嚴密、節奏清晰，編劇之間分好工，各自逐場寫。最後是由編審改稿，作出內容及風格的統一，因每個編劇的寫作風格、思維都有分別。

說到底  想要大眾的認同  

談及編劇的人工，Roy笑言：「唔好講呢啲啦！你都估到一定好少，所以想要靠份糧買樓結婚暫時根本無可能。但我鐘意份工！你唔覺得，你寫嘅嘢被人認同係好正嘅事嗎？可能係我個人喜愛虛榮感！哈哈！係街聽到人討論我寫嘅嗰套劇，會好自豪，沾沾自喜；如果套劇幾年後，甚至係幾十年後都有人講，嗰種成功感無法形容。」

想要得到觀眾的認同，想要創作出流芳百世的作品，他說創作路份外痛苦，總想要追求完美，時刻都在：今天的我打倒昨天的我。以形容一個角色性格固執作例子，固執到什麼程度？為甚麼固執？是天生嗎？還是因為某件事情而持續形成？一步步深化，才能形成有血有肉的人物角色。「整個過程，我嘅思維不斷轉變，不斷ban自己，很多時候去到交稿前一刻才定實內容。」

▪ 香港的Fintech到底落後了幾多？金融科技實現無現金社會、開創各種交易服務

▪ Compliance做啲咩？10年前於次按危機崛起，竄升為金融機構指定席位

入行小關鍵  審美品味

電視劇集的觀眾上至80歲婆婆，下有5歲小朋友，而大台劇集更是入屋食飯必備，所以想編好一套劇，就要有品味。所謂品味，即與大眾同步的審美品味，Roy解釋：「套劇要俾人睇，一定要其他人睇得明，鐘意睇，唔可以得編劇自己明，自己鐘意。」

如何切合大眾的審美品味，又不失新穎，就要編劇的創意來平衡啦！Roy相信，世上很多工作都將會被人工智能（AI）取代，唯獨創作不能。而編劇這行業，發展空間一定有，只是香港市場漸漸萎縮，大多都向北發展。加上網絡流通，觀眾能選擇的劇集大增，韓劇、Netflix、內地視音平台⋯⋯多不勝數，想當編劇，眼光就要望遠些！

此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。