［暑期系列］盤點六大intern奇行種
每逢暑假，好多公司都會請啲intern返嚟，每條team塞一隻，貪佢哋平平地，可以舒緩吓同事人手不足嘅怨氣，等佢哋冇聲出；同時又可以建立吓企業形象，喺CSR report度寫吓公司幾咁注重培育社會未來棟樑，簡直係一箭幾鵰。
條team多個人做嘢當然好，不過如果不幸遇上「奇怪煙腸（intern）」，隨時幫忙變成幫倒忙。
炒散行情最新最快﹗
兼職、短期工、臨時工、Freelance，自選工作模式，最新空缺情報盡在此﹗
1. 毫無主動型
有啲intern可能習慣咗做學生嘅模式，老師叫做功課先做，以至返工時都係踢一踢，郁一郁。佢哋嘅口頭襌係：「你又唔講，我點知要做？」「你又冇講幾時要交，我點知你急要？」「你又冇話要幫手，點解我唔可以做自己嘢？」其實調返轉，你身上又冇裝GPS，你唔主動講，人哋都唔知你幾時做完手上啲嘢㗎。
曾經見過不止一個intern，做完手上嘅工作後，「以為冇嘢做」，於是就坐喺個位瞓覺，其中一個仲要係「後仰擘大口式」瞓法，蔚為奇觀。一陣老細經過見到，又會質問啲同事「點樣帶新人」㗎啦。
不受歡迎指數：★★★☆☆
2. 求其交貨型
有一類intern，可能係覺得上司交畀佢哋嘅工作太簡單、太瑣碎，侮辱咗佢哋嘅智慧啦。朋友A曾經帶過一個intern，叫佢砌一個PowerPoint，第一頁格式已經整好咗，intern只需要copy and paste之後嗰百幾頁就得；Intern非常快手就做完交貨，喺度玩手機。
點知朋友A一檢查，嚇然見到啲圖同字全部錯晒位，font又唔統一，於是叫佢改返啦，佢竟然話：「我真係睇唔到有問題囉。」朋友A知道拗落去都冇用，結果都係死死地氣自己慢慢改……遇上求其交貨嘅intern，計返你開頭教佢同之後自己慢慢執嘅時間，可能仲耐過自己親手做。
不受歡迎指數：★★★★☆
3. 目中無人型
見過有啲intern成日黑口黑面，朝早唔會講早晨，走唔會講再見。唔緊要啦，做到嘢就得，點知帶到出街先出事。話說某次叫該intern幫手做reception，佢問個客攞卡片填資料，還返張卡片時，竟然係用「食指同中指夾住」咁樣遞畀佢，嚇到一眾同事差啲大叫「Oh my god！」
另外亦聽朋友分享過佢公司請過一個intern，佢好醒、好做得嘢，但一見到有問題嘅嘢就會不留情面咁插。佢last day嗰日，竟然入房同老細講哂全公司每個部門有咩問題，啲manager點樣唔掂，之後就走咗去；老闆當然勁buy佢咁做，而一眾可憐嘅中層就要承受惡果……可能intern覺得佢咁做係對公司好，但凡事最好都係留一線，除非肯定自己第時一定可以做到老細嘅位，個個聽晒佢話啦，否則「出得嚟行，預咗要還」。
不受歡迎指數：★★★★☆
4. 皇親國戚型
有啲啲老細好鍾意搵自已親友嘅仔女、客嘅仔女，甚至自己嘅仔女入嚟做intern。遇著呢類intern，有時真係唔係好識點「帶」佢哋。鬧又唔鬧得，驚佢哋返去同daddy訴苦；又唔敢畀啲太簡單嘅嘢佢哋做，驚佢哋同daddy話公司睇唔起佢哋。
最痛苦嘅係，當佢坐喺自己條team入面嘅時候，感覺就好似身邊多咗一部人肉CCTV咁。如果咁啱俾佢見到你用WhatsApp、睇Facebook，仲唔成為佢同daddy茶餘飯後嘅開心話題？
不受歡迎指數：★★★★★
5. 貴族子弟型
作為「皇親國戚型」嘅一條分支，其實呢類intern做嘢同態度未必有問題，只係你唔太明點解佢要入嚟做intern，同埋唔識點樣同佢哋相處，因為佢袋入面啲零用錢隨時等於你半個月糧。
曾經見過一個intern妹妹跟team出去搞event，阿姐千叮萬囑大家要好好招呼個重要嘉賓。點知個嘉賓一嚟到，即刻鬼咁開心咁同intern妹妹打招呼，原來佢係intern妹妹嘅細叔伯……之後佢哋兩個行埋一邊，一路食event啲點心，一路傾到眉開眼笑：「你幾時畢業呀？我refer你入嚟我度做啦……」（100%真人真事）
不受歡迎指數：★☆☆☆☆（純粹係葡萄心理）
6. 努力實幹型
最後，公道啲講，除咗以上類型嘅小眾之外，筆者遇過嘅intern其實大部分都係好好嘅。好多intern一開始真係未必識做，但會拎住本notebook同筆，好細心咁記住啲步驟，好勤力咁去做，遇到唔識做或者做錯嘅地方，亦會虛心咁問同改正。有幸遇上呢種intern，真係幫到大忙，可以為成條team帶來朝氣同愉快嘅兩、三個月。有時知道intern弟弟妹妹畢業後，搵到一份好好嘅工，成就甚至好過自己，會真心為佢哋感到高興，就好似見到自己細佬妹成材一樣。
受歡迎指數：★★★★★★★★★★
其實年輕一代成日覺得班舊人針對、睇唔起佢哋，當然世上的確係有好多無料扮四條嘅old seafood，但都不妨檢討返自己，係咪已經做到最好先。如果自己真係有料到嘅，以後大把機會可以理直氣壯咁大返班廢中／廢老啦，係咪？
（圖片來源：WhatsCap）
延伸閱讀：
Reply Email Samples: 10 Scenarios You Always Encounter
此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。
