疫情期間網騙激增！私家偵探揭爆肌台男設130萬「像極了愛情」的騙局
因為疫情關係，大家多咗宅喺屋企，連社交都全面「網上化」，近呢半年敝偵探社收到特別多有關網上情緣詐騙嘅個案，而且單單大鑊，騙7位甚至8位數字都有！
「心痛苦，比處死更難受」，唔少客人發現自己唔止被騙財，仲白白付出咗真心，都無法接受現實，喊住離開敝社門口。所以今次就想再同大家分享感情騙子嘅技倆，希望大家喺投入感情之前，都可以理性分析一下，唔好咁容易墮入騙局。
50歲三子之母 愛上失戀爆肌台灣小鮮肉
呢單個案嘅受害人係一位50歲嘅人母，佢生咗三個小朋友之後就俾老公包二奶拋棄咗，二十幾年嚟都係靠自己一個人打工儲起啲錢，含辛茹苦咁養大啲小朋友。今年年初，佢喺WeChat認識咗一個男仔，睇相好似大大隻又幾靚仔咁，就傾起上嚟。
大隻仔表示自己今年28歲，本身係台灣人，幾年前嚟到香港工作。言談之間，事主透露咗佢俾老公拋棄嘅傷心往事，然後大隻仔就好感慨咁話，估唔到大家嘅經歷咁相似！佢話自己都係俾自己嘅初戀女友「劈腿」飛咗，為咗離開台灣呢個傷心地，所以先嚟香港，之後仲同人合伙開咗間投資公司。
事主同大隻仔傾咗一至兩個禮拜，愈傾就愈投契，天南地北無所不談。疫情關係冇得出街，大隻仔就話自己鍾意行山，久唔久會send啲喺野外影嘅爆肌露點相俾事主睇；夜晚傾電話嘅時候又會喺後面播情歌，仲話「每次聽到呢首歌都會諗起你」，事主不知不覺間就被電到暈得一陣陣。不過傾咗一排都無發展到咩特別關係，好似處於「猶疑在似即若離之間」嘅曖昧階段咁。
有一日大隻仔同事主講，佢哋公司有一個千載難逢嘅投資機會，兩星期就可以翻幾倍而且完全零風險！個投資計劃正常只可以俾公司嘅12位VIP參加，而家差一個人，大隻仔話知道事主養三個小朋友咁辛苦，就可以私底下做啲手腳，等事主有得參加賺吓錢；事主覺得機會難得，就過咗50萬去大隻仔個戶口度。過左兩個星期，大隻仔send咗啲「大貓銀行」同其他金融機構嘅單據俾事主睇，哇！真係賺咗200萬喎！不過大隻仔話啲錢要交咗稅先可以拎出嚟，叫事主轉多40萬俾佢。事主好想快啲有錢到手，就拿拿臨過數。
點知過咗數之後，大隻仔就失咗蹤，成個禮拜都聯絡唔到。正當事主焦急之際，突然有個男人聯絡事主，問：「你係唔係XX個女朋友？」男人自稱係大隻仔嘅阿叔，佢話因為事主唔係公司嘅VIP，而參加咗個投資計劃，俾公司發現咗，所以大隻仔俾人捉到仲要禁錮埋！但係阿叔話佢有啲人際網絡幫到手，只要有多40萬就可以救返大隻仔出嚟。事主呢一刻已經俾愛情蒙蔽咗，乖乖地送多40萬出去。唔使問都知，收到錢之後呢兩「叔姪」就齊齊消失，連同130萬石沉大海。
到咗呢一刻事主仲係覺得大隻仔只係被禁錮緊，所以上嚟敝偵探社希望「尋人」。經過調查之後，我哋發現嗰啲所謂單據全部都係偽造，有啲地址寫住「中環乜乜街乜乜號」嘅，其實嗰條街根本冇嗰個號數。事主聽到之後完全無法置信，三番四次叫我哋再查清楚！於是我哋再查到，相入面嗰個大隻仔原來係越南一個唔出名嘅靚仔男model，騙徒特登搵佢IG喺郊外影嘅相，令事主分辨唔到原來唔係喺香港影嘅。事主初初都唔相信，死口話係人哋盜用佢啲相，直到我哋搵到佢上電視節目講越南文嘅影片，先至肯醒覺。
真相大白之後，事主真係晴天霹靂……除咗辛苦儲咗咁多年嘅錢全部付諸流水之外，自己喺呢半年所戀上嘅對象，原來只係一場夢。
感情騙子有特徵 科水前請諗一諗
大家睇完呢啲案件，好多時個反應都係：「唓！佢蠢啫！」但係點解咁多年嚟都仲係有咁多人中招？其實騙子當然唔會一開口就講錢，而係花幾個星期甚至幾個月嘅時間去取得你嘅信任，然後先慢慢氹你「科水」。我哋綜合咗案件嘅一啲共通點，喺度同大家分享一吓：
就算對方張相幾靚仔靚女都好，背後真人可能係男扮女、女扮男，甚至係奇醜無比搲緊腳趾嘅肥佬。所以，當你要求見面或者Face Time，佢哋一定會用各種籍口推搪，好似近期好多騙子就話自己中咗肺炎，喺醫院隔離緊出唔到嚟。
佢哋會扮自己有同你相似嘅經歷，去取得你嘅共鳴，例如你俾伴侶拋棄咗，佢就話自己失戀仲未放低，顯示自己好專一；你移咗民，佢會話自己都係離開出生地去闖天下；知道你有咁上下年紀，佢就話自己啱啱死咗老婆有個仔（甚至send埋個仔張相俾你睇）。
牽涉幾十萬以上嘅呃錢方式大致分為兩種，第一種係千載難逢、好短時間就有幾倍回報嘅投資機會；第二種就涉及找換店、跨境匯款。通常頭一兩次會收到所謂「成功回報」嘅證明，到第三次就會失蹤，再加上騙徒係「膽拖腳」咁感情連錢呃，事主愛上咗騙徒之後就更容易俾錢，通常都會呃幾次先識醒。
其實遇到呢啲騙案，雖然係有機會搵得番騙徒同損失嘅財物，不過你付出咗嘅感情同傷害就好難用金錢去修補。
每次接到呢啲case，見到事主人財兩失、傷心欲絕咁樣，其實我哋都好同情同心噏。希望大家都可以引以為鑑，我哋都唔想有機會做你生意㗎！
P.S. 以上案件嘅人物、時間、地點及內容都經過修改
偵探Nic Li
由記者仔做起，累積經驗及人脈網絡，漸漸變得神通廣大，成為偵探社社長。查案時心思細密，明察秋毫，機警過人。閒時熱愛足球，活力十足。現為世紀國際偵探社長、香港偵探總會副主席及英國資歷培訓偵探導師。
檢視此作者的所有文章
此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。
