想喺英國搵返金融銀行工作？港人移民前應做好3個準備

近幾年幾乎每一個同親戚或朋友嘅聚會，都有觸及到「走唔走」呢個話題。當然，是去是留，要考慮嘅因素實在太多，無絕對嘅啱同錯。

對於做開金融或銀行嘅朋友嚟講，要放棄喺香港嘅高薪厚職，就似乎係一個比較大嘅阻力。好正常嘅，金融行業作為香港經濟支柱，多年來吸引咗幾多人才入職，養活咗幾多家庭？喺其他國家或地區，要搵返相稱嘅職位、類近嘅薪酬，真係相當艱難。

就以英國為例，喺倫敦呢個國際金融中心，本來已經人材薈萃，喺香港嘅行家本身嘅人脈或知識，都未必可以帶到倫敦應用。如是者，人哋有咩必要 match 返你喺香港嘅人工呢？

如果大家都喺呢個位掙扎緊嘅話，我有三個建議，睇吓幫唔幫到大家。

1. 爭取 internal transfer

香港作為投資大中華區嘅金融中心，有好多跨國企業都選擇喺香港設立辦公室。如果大家有幸置身其中，其實就已經贏在起跑線。

無論係循最官方嘅途徑申請內部調職，抑或係透過工作結識 Regional Office 甚至 Global Office 嘅同事，得以引薦去海外工作，都總算係有機會 internal transfer 。街外人恨唔到㗎。

當然，呢啲嘢好睇天時地利人和，如果你公司本身唔鼓勵香港員工調職海外，又或者你本身同倫敦辦公室嘅同事關係麻麻地，就此路不通了。否則， internal transfer 應該係最容易同最安全地確保你離港後仍然有一份收入唔錯嘅工作嘅方法。

▪ 英國搵工不必貼相！提升海外求職成功率，CV、Cover Letter要點寫？

▪ 3大部門最有機被調！企業轉移業務至外地，員工需注意咩事項？

2. 舖定人脈網絡

呢度可以係兩個層面嘅。一方面，如果你已經有朋友或舊同事喺英國落腳，可以同佢哋 say 個 hi ，了解下行情，甚至乎問吓佢哋公司會唔會有空缺，有冇機會介紹自己入去做。

需知道 HR 取易不取難，喺有更多 local experience 嘅人值得選擇嘅情況下，未必貿貿然安排一個陌生嘅異鄉人進行面試。呢啲位，都係「識人好過識字」㗎喇。

另一方面，有專業知識嘅朋友可以同仍然留喺香港嘅行家打招呼，探討一下有冇合作嘅機會。生意模式有好多，大家發揮多少想像力總有可能做到。就舉一個實例：有證券行嘅資深員工喺外國生活，改以外部顧問形式，向行家提供技術支援。

呢度當然涉及比較複雜嘅人事、法律甚至稅務安排。有冇機會簡簡單單，將自己喺香港嘅僱傭合約，轉換成海外僱傭合約甚至係vendor / contractor 嘅合同，就睇大家如何同公司商討。

▪ 半數打工仔願出走打工！令人嚮往海外工作地點：英國加拿大增幅明顯

▪ 在英港人分享！移民英國如何搵工？有咩工作機會及求職方法？

3. 調整心態，從低做起

先旨聲明，呢個選擇可能會為大家帶來短期嘅陣痛。

撇除畢業冇耐、機會成本較低嘅後生仔女，喺行內打滾咗五至十年或更長嘅朋友，職銜同薪酬都可能係 junior management 或更高嘅層次。

但係企業架構嘅嘢，通常都係金字塔咁，上窄下闊。即係，中低層嘅員工人數同職位空缺，總會比高層為多。再者，香港人本身缺乏喺外國工作嘅經驗，對外地職場文化認識有限，能否一時三刻勝任管理層嘅崗位都成疑問。

如果大家可以放低身段，選擇應徵一啲比較 junior 嘅崗位，成功機會可能會大啲。因為英國職位空缺確實存在，尤其是比較基層嘅職位。透過呢個方式入行然後強化自己嘅履歷，日後總有機會上返去一啲比較理想嘅職位。

以上三個方法各有長短，大家能否應用就睇返自己情況。講到底，選擇喺另一個地方生活，自然係有一啲誘因、一啲吸引你嘅地方。有得，就難免有失。係咪捨得放棄喺呢度已經建立咗嘅事業同地位，就視乎大家覺得離開嘅 push and pull factors 孰輕孰重喇。

此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。