一講起護士,大家都會即刻諗起平時喺醫院嗰啲戴住口罩嘅姑娘。今次小編專訪咗兩位精神科猛男護士:楊Sir同佛哥,分享佢哋工作嘅點滴。呢個職業好似好神秘咁,其實同普通護士有樣嘢類似,都要經歷「屎、血、死」三大關。但最大分別係:病人基本上唔會康復,工作上會無乜滿足感。
普通科護士多數係女性照顧晒男女病人,但喺精神科,男病人房嘅護士就基本上都係男性,冇返啲體力,點應付到突然發狂嘅病人呢?佛哥笑住講:「不過大家都一樣有三大難關:屎、血、死,要過到先可以做護士。呢三樣嘢除咗得人驚,仲好難搞又好麻煩,尤其是精神科,病人一般身體無咩問題,如果突然死亡,就要寫好多好多report,交代發生咩事,仲會俾腦細煩死!」
另一方面,精神病唔會好似一般病咁,可以明顯見到病人好返晒,一個病人隨時入院幾個月、幾年,情況都係差不多,就算佢地出咗院,都可能狀態時好時壞,仲要keep住食藥同定時返醫院較藥。楊Sir補充:「大部分病人喺我哋長期照顧之下都無咩好轉,感覺好似幫唔到佢哋咁,好多同事喺工作上得唔到滿足感,都做到冇晒癮。人手方面又只係啱啱好做到要做嘅嘢,做唔到extra嘅嘢去幫多啲病人,我見到佢哋俾人誤解、歧視,都好心酸㗎……」精神科工作咁神秘,唔講唔知醫護人員咁辛苦。
咁到底佢哋滿唔滿意自己份工呢?佛哥略有所思地回答:「如果你接受到幫病人換尿片沖涼,又唔驚病人突然做出好有新鮮感嘅舉動,例如無啦啦打隔離個病人,或者你,哈哈!仲有要唔怕on shift看夜,我啲女同事就話自己殘得好快……做護士同返朝九晚五嘅工好唔同,大時大節未必放到假,幾年都固定守一間病房,同事及工作環境又唔會大變……更唔存在貼近市場嘅講法!」
至於楊sir就毫無懸念,不知幾滿意呢份工:「想當年護士學校招生嗰陣,已經講明係一邊讀一邊有人工收,讀完出嚟之後人工仲要唔錯,生活穩定,呢樣嘢已經好多人都渴望啦。再加上返Shift,放平日其實好多好處呀!嗱,食飯平過weekend就大家都明啦,更爽嘅係唔使同人迫,唔使點排隊,避開晒所有人潮!我哋一更返七個鐘,一星期返六日,其實計返,係比一般返九五嘅人多好多時間做自己嘢,尤其是返早,放工都只係兩點幾。」
(image via Commons)
不過對於一心喺職場上拚搏一番嘅人,就未必適合做呢行啦。楊sir話佢喺病房做咁多年,日日都係咁上下,收症、病人出院轉院、醫生巡房嗰時就忙啲,多同事返工又冇新症就得閒啲,做耐咗所有嘢都變成手板眼見工夫,真係無咩位可以上。「呢行一入職,如果係登記護士,就要先進修,成為註冊護士,然後再根據經驗同工作表現升為資深護師、病房經理等一路升上去,每一步都循規蹈矩。就算有位上,都唔係個個都想升做病房經理,因為人工唔會多好多,但又要做多啲行政野。其實護士嘅晉升階梯明確,前題係如果想升的話。」佢就話自己冇乜博出位,一動不如一靜,唔少同事都寧願穩穩定定,用自由時間搞副業,仲開心咁話!
小編最後問咗句,身為精神科護士,咪好識處理情緒?佛哥大笑咁話:「哈哈,做精神科護士真係好少OT,啲嘢做唔晒就留畀下一更同事做,就係咁簡單。收工就收工,無咩壓力,唔會收到腦細或者個客嘅WhatsApp,咁就自然精神健康100分啦!」其實呢,每份工作都有好與壞,最重要係認清自己想行嘅路,想要嘅生活,咁就可以選擇適合自己嘅工作。
此文章由原作者及Jobsdb HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及Jobsdb保留採取法律行動的權利。