14句不可對老細說的話（及老細的神邏輯）

上次講完「5句打工仔最想老細講的說話」，當然小氣嘅「方丈」都會有唔想聽到嘅說話，亦會反射性地用佢哋自己嘅神邏輯去詮釋同回應你嘅說話。如果你自問平時得罪人多，記得以下嘅說話千祈唔好亂講，以免自取滅亡！

不要說：「我唔知喎……」

老細神邏輯：「你個腦裝草㗎？你有咩係知㗎？」

試著說：「我check返先，轉頭send返個figure畀你。」

不要說：「呢個做唔到喎……」

老細神邏輯：「我請你返嚟係同我解決問題，唔係製造問題！總之你要同我死掂佢！」

試著說：「如果要咁做，我認為應該要XXX。」

不要說：「呢啲嘢你叫XXX做囉……」

老細神邏輯：「而家啲後生仔個腦諗乜㗎？俾你做塞錢入你袋咋，仲講！」

試著說：「其實呢樣嘢係XXX負責開，我唔敢亂郁佢啲嘢，不如我問吓佢先？」

不要說：「我工作範圍唔包做呢啲嘢㗎喎……」

老細神邏輯：「而家公司畀機會你試，又有嘢學又有挑戰性，仲要出埋糧畀你養你全家，你仲唔做多啲嘢報答返公司！」

試著說：「我明白你嘅意思，但咁樣做可能會令我而家跟緊嘅其他project有延誤，定係我應該跟咗呢樣先？」

不要說：「我都係照你指示做啫……」

老細神邏輯：「我冇咁講過！係你自己聽錯！」

試著說：「據我理解，你上次嘅指示係要XXX，定係我誤解咗你嘅意思？」

不要說：「人哋都係咁做㗎啦……」

老細神邏輯：「你唔識用腦諗㗎？咁人哋叫你去死你唔去死？」

試著說：「根據之前嘅經驗，XXX會比較可行。」

不要說：「無論點做個客都係會投訴㗎啦……」

老細神邏輯：「我日日都收到你嘅投訴，係咪可以唔出糧畀你？」

試著說：「我建議應該XXX。」

不要說：「我今年好勤力做嘢，可唔可以加人工……」

老細神邏輯：「你份人工咪已經包括咗你勤力做嘅份內事囉！你要對公司有額外嘅付出我先至可以加薪畀你㗎喎！」

試著說：「今年我為XXX帶嚟咗1000%嘅升幅，我希望公司可以用加薪去肯定我嘅努力。」

不要說：「有冇得claim返尋晚嘅OT錢……」

老細神邏輯：「後生仔唔好斤斤計較！我後生嗰陣冇糧出都照做啊！」

試著說：（自己執生）

不要說：「我儘量今個星期做起佢……」

老細神邏輯：「儘量？我儘量今個月出糧俾你得唔得吖？」

試著說：「要趕得切呢個進度，需要XXX嘅時間同resources。」

不要說：「Sorry，畀次機會吖…… 」

老闆：「機會？大富翁呀？使唔使畀埋命運你呀？ 」（來源）

試著說：「今次我知道自己犯咗XXX嘅過失，下次我會XXX。」

不要說：「我已經晚晚OT，唔可以再加workload啦……」

老細神邏輯：「公司從來都唔鼓勵同事OT嘅，你OT即係話你揸流攤！你要學識time management同set priority！」

試著說：「我已經同時做緊ABC三個project，好難再兼顧多一個，或者其中一個可唔可以交俾XXX負責，我同佢一齊做？」

（老細提出不可行計劃）不要說：「你係老細，你鍾意啦……」

老細神邏輯：「咁我唔鍾意出糧咪唔出囉！有冇意見啊！」

試著說：「你之前係咪都試過呢個方法行得通？我覺得……」

不要說：「老細，我想辭職……」

老細神邏輯：「而家啲後生仔冇啲責任感，話辭職就辭職，公司畀咁多機會你都唔識感恩，出到去咪又係做埋啲下欄嘢！」

試著說：「（拍枱）我家陣唔撈啦，老！闆！」（如果你確定下一份工唔會問呢個老細攞reference）

其實老細嘅神邏輯同創作力量往往係層出不窮，要老屈你無論點都係會老屈到，所以以上嘅建議都係僅供參考。各位打工仔都係自己執生，少說話多做事啦！

（圖片來源：WhatsCap）

此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。