地盤佬日誌—地盤最重視嘅節日
每年都有咁多節日，而每個行業都有佢哋重視嘅節日，亦都有某啲節日唔係好慶祝。就等我簡單咁講吓「地盤佬嘅節日」。
地盤唔重視嘅節日
基本上所有西方節日，例如係聖誕節、復活節等，地盤佬都係一啲都唔重視嘅（某啲外資公司除外）。另外，部分中國傳統節日，如清明節、重陽節、端午節，亦都係冇乜特別氣氛。因為係法定假期，地盤唔可以開工之外（如果申請到環保豁免，直頭會開工），所以基本上冇乜特別。
地盤重視嘅節日
講到地盤最重視嘅節日，一定非農曆新年莫屬。除此之外，中秋以及冬至，都會比較受到重視。
農曆新年：呢個一定係一年裏面最重要嘅節日。喺地盤裏面，有啲勤力嘅師傅一年淨係會放農曆新年（一年返足36X日工），同埋多數師傅都會早啲收爐，遲多幾日先開工。不過，我都見過有地盤大灑金錢，派超高獎金，吸引師傅成個新年都繼續開工（如澳門某個賭場盤，用咗九位數字，去令到新年嗰幾日有七成嘅師傅返工，不過可惜生產力係10%都唔到）。
講到農曆新年，就不得不提派利是。基本上，地盤個個人都會有開工利是。至於數目方面，有啲判頭、老細會當花紅咁派成四位，甚至乎係五位數字利是，但係都見過有判頭派$5利是佢下面嘅師傅。最後，師傅當然唔開心，仲即時掉咗。之後，個判頭踎低執返話：「你唔要我俾個第二個！」。而我哋做上家嘅，就通常會睇吓下家有幾多判頭而決定利是數量。因為每個判頭嘅利是都唔會太大封，所以判頭越多，利是就越多。
冬至：香港冬至係冇假期㗎，不過如果嗰日早啲做晒當日嘅嘢，係可以早收嘅。如非好必要，就真係冇人會OT，因為大家都想安安樂樂返屋企食餐飯。
中秋節：收早嘅傳統就同冬至差唔多，另外我哋上家嘅，就會有多到食唔晒嘅月餅，又係判頭越多，月餅就越多。
地盤獨有嘅節日
魯班仙師節（師傅誕）：師傅誕應該係除咗地盤同某啲工藝行業之外，唔係好多行業會慶祝嘅節日。魯班被譽為工匠界嘅祖師爺，所以多數都係工藝界嘅人先會慶祝。聽講以前好多老闆都會喺師傅誕請食飯，不過依家好似越嚟越少老闆會注重呢個節日。
無論咩節日都好，喺全年生活嘅忙碌同緊張當中，有啲節日高興下，令大家減吓壓都係一件好事嚟嘅。
港夫．李澳
香港土生土長，近年來移居澳門，一個熱愛畫畫的地盤工程師。開立了facebook page「港澳小不同」，通過圖文來與人分享我心中所想。
檢視此作者的所有文章
此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。
