每個行業都有佢嘅術語,地盤當然唔例外啦!今日就等地盤佬為大家介紹咁有特色嘅地盤字。
如果要問地盤字嘅精要係咩,我會答你係「簡」。即係好似簡體字咁,將所有嘢都盡量簡化。例如除咗正式報告之外,冇人會寫混凝土,一係就寫「石屎」,一係就寫「石矢」。喺內地直情發明左一個半正式嘅字「砼」(混合象形文字,因為佢哋覺得混凝土就係人工製造嘅石頭)。
另外,一個地盤好常用嘅字都係因為太多筆劃,所以墨王都係唔會寫佢嘅正體字,呢個就係「牆」,多數人都會用「垟」,基本上已經同讀音合體,攞佢一邊嘅土屬性。
例如係好多有用嘅工具箱,或者有機會俾人當垃圾嘅上面,都會有人噴一個合體字「有用」兩個字,合埋,好多人冇見過第一次見都會明白佢嘅意思。 又例如地盤好多時要打鑿石屎或磚牆等等,但係個「鑿」宇有太多筆劃,如果要噴油字或者大毛筆寫,本身就好難寫所以就有人創造咗「作金」呢個合體字。其實我都試過攞墨王嗰支毛筆喺埲牆度寫個鑿字,但係寫完之後基本上都係睇唔到寫咩。
地盤字嘅發明,通常都唔係有人刻意去研究製造出嚟,而多數都係為咗方便之後,再約定俗成,最後多數人都用就製造出嚟。當然都唔係絕對統一,唔同人都有唔同嘅方法去表達同樣嘅嘢。始終文字都係用嚟記錄,同埋令其他人要明白,所以有陣時大家睇得明就得啦!希望呢篇文都幫到大家了解多啲地盤字啦!唔知大家個行,又有冇啲咩特別字呢?
港夫.李澳
香港土生土長,近年來移居澳門,一個熱愛畫畫的地盤工程師。開立了facebook page「港澳小不同」,通過圖文來與人分享我心中所想。
此文章由原作者及Jobsdb HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及Jobsdb保留採取法律行動的權利。