地盤佬日誌—風水輪流轉
入行咁耐，都見過唔少例子係當年我炒你，幾年後你做我上家，之後就玩到氹氹轉。
上下關係
建築業有兩個上下關係，一種係正常所有行業都有的上司下屬關係：老闆＞董事＞經理＞工程師／管工。
另一種係上家下家關係：業主發展商＞顧問公司＞承建商＞分判商。即使有時上家係好低級的小薯仔，都可以玩到下家雞毛鴨血。
上下逆轉
喺行內打滾多年見過有唔少上下逆轉嘅故事。例如有啲係好勵志嘅，一個啱啱畢業嘅小薯仔，俾個大佢幾年嘅廢柴工程師針對。之後過咗十年八載，兩個都仲係做緊同一間公司，但廢柴工程師就升咗做高級工程師，小薯仔就發奮圖強升做項目經理（PM），之後小薯仔就調反轉，對廢柴工程師呼呼喝喝。
另外，聽得最多的故事就係做完下家轉做上家。例如好多人上一個項目做判頭打理，比大判啲人日鬧夜鬧，個打理之後轉工去做皇家佬（政府的監工），又對返同一班大判嘅人，態度就會一百八十度大變，日日對住佢笑口噬噬。
大逆轉
其實人生有少少似鬥獸棋咁，當你以為你去到最強嗰陣時，有機會出現大象比老鼠食嘅特別情況。聽講有某個地盤嘅大項目經理（PM）見人就鬧，仲要係人身攻擊嗰隻。有次佢嗰個項目涉及所有啲公司資產（例如機械等），啲三沙（小分判）呢個拉完大隊走，過幾日就第二間拉大隊走。最後佢啲地盤越鬧越慢、越鬧公司越蝕錢，之後一兩個盤後，個PM就消失咗啦。
雖然我哋一行都係「誰大誰惡誰正確」，但係地盤呢一行，就算你做到幾大嘅官，都有機會風水輪流轉。
港夫．李澳
香港土生土長，近年來移居澳門，一個熱愛畫畫的地盤工程師。開立了facebook page「港澳小不同」，通過圖文來與人分享我心中所想。
此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。
