疫症對於航空業的打擊非常巨大,一眾空姐、機師、地勤等都被逼停止工作。馬死落地行,有人去外賣平台做步兵,也有爭相去一田感謝祭做兼職,難關在前,到底如何面對?Jobsdb 今年最新公布《2020 年薪酬調查報告》訪問了超過 4,000 位香港上班一族,當中有近76%求職者表示有意欲轉行,佔最高比重的26%為款待及旅遊業從業員,顯見疫情對這行業員工的影響。小編找來4位空姐談談她們的轉工經過。當中3位都是在疫症漫延時離職,有的憑周遊列國的經驗努力創業,也有的加入普通公司重回朝9晚5上班族生活 ,適應從低做起的工作;也有一位尚未正式離職,但也默默計劃中。經濟環境不能改變,也沒有超能力瞬間擊退肺炎,更無法預計何時能重新再如常飛行,唯一能做的便是改變自己,尋找新的工作和生活方向。
此外,是次調查又發現,原來擁有 3-5 年工作經驗再轉行,獲得加薪的可能性會較高;轉行加薪固然是樂事,不過除了薪金以外,轉行計劃亦應好好考慮新工種是否符合個人興趣、能力及成長方向等。
背景:任職空姐6年,2020年2月正式離職
現職:網店老闆,出售世界各地的健康食品和保健品
收入:平均月入2-3萬
Joyce在2019年底離職創業,創辦專門出售保健品的網店,生意自疫症爆發後不降反升,營業額比上年12月足足增加一倍。難以想像吧!她自己也很驚訝,笑說:「世事難料,因為有肺炎,香港人比以往更加注重健康,對於保健品趨之若騖,但求有多擺屋企看門都唔好缺。」她在3年前開始經營代購,透過Facebook、IG等社交媒體吸客。代購初期,產品五花八門,飛到哪買到哪,沒有明確目標。後來漸漸捉摸到門路,發現保健品的市場頗大,便專門代購健康食品和保健品。
圖左為Joyce,攝於離職之前,與友人在機場附近回憶過往幾年的飛行故事。
「愈來愈多客人主動搵上門,於是我都改變飛行習慣,專飛長途機去美國和澳洲,主打呢兩個國家嘅保健品。做做吓我接觸咗一啲小眾品牌,直接同批發商拎貨,擴大生意,唔止淨係代購,都試吓入貨嚟賣,結果又幾理想。」3年時間,她慢慢累積客源和口啤,漸上軌道,但談實際收入並不多,只有1萬多。
「2019年,賺嘅錢好穩定,每月1萬幾,始終我要返工,好多時間應唔到,又寄唔到貨。我一直有個念頭,想辭職全職搞,但又好驚失敗!下半年飛得少咗,擺多啲時間係生意度,原來真係有收穫,於是年底前把心一橫辭職。」她租了觀塘工廈約200呎的小單位,同時作為辦公司、存倉和店鋪,寄貨方便,也能讓客人上門自取。
▪ 人工10年前後對比:IT、會計、Marketing入門級職位 升幅最少係佢?
疫症來襲,保健品生意反而蒸蒸日上,查詢強化心肺功能、增強免疫力等相關產品的客人每日多不勝數。生意額直線上升,Joyce感慨:「有危先有機,世事好難預料。多得做空姐嘅經驗,除咗搵到窿路拎貨,更加係應對客人時特別有耐性。喺初創階段,每一個客人都好重要,口碑真係我最大嘅生意來源。」
背景:現職空姐,自從疫症開始後做一直沒有返工
現職:補習老師
收入:平均月入2-3萬
Hailey現時還是空姐,但已經沒有工作將近3個月,正打算下個月辭職,現時主要工作是私補老師。她的補習生涯由大學年代已經開始,即使畢業後做空姐時也無間斷,主要幫中學生補習中文和英文。本科是英文系,但DSE文憑試中文科也有5*的好成績,囊括兩大語文科。「初初做空姐,周圍飛好開心,就幫人補得少啲,或者係收啲初中學生,時間輕鬆容易遷就。但時至今日都5年啦,玩夠啦,只係當空姐係一份工作,後期飛少咗好多,多數飛短途。近呢2年,多返啲幫人補習,賺吓額外收入,只係補3個學生,每月收入多1萬幾。」
她改變飛行習慣,將補習的比重增加,但也一直沒有辭工的打算。始終習慣了這種自由自在的生活和工作模式。但在2019年中,工作環境改變,香港經濟轉差,她萌生了辭工的想法。「如果唔係大環境改變,我真係一直沒諗過辭工,可以想飛就飛,屋企人又有福利,幾好啊!後來時勢唔同,我都要諗定後路,諗咗好耐可以做到啲咩?又想要做啲咩?講真,我好難想像自己入返寫字樓,打份朝9晚5嘅工。諗咗一排,發現全職補職都有得發圍啊!9月開始狂搵學生,又叫啲學生介紹多人嚟補,結果又幾理想。」
針對高中學生的中文及英文科,1對1私補,每日2個學生,每堂1.5小時,一星期補8至10堂,收入已經可以達到$5000至$8000 。她擁有多年的補習經驗,口碑向來不俗,全職投入心力後,學生慢慢上升,現時收入已相等於空姐人工,更有不斷上升的趨勢。
攝於芝加哥大學,Hailey經常在世界各地的大學留影,用以營造熱愛學習的形象。
背景:任職空姐5年,2020年1月離職
現職:移民公司Sales and Marketing Executive
收入:平均每月2-4萬
Amanda以全新人的姿態加入知名移民公司,原本以為會出現職場水土不服,結果統統沒有啊。她在新行業內如魚得水,笑說:「我嘅工作就係搵客同湊客,主要follow英國同埋澳洲嘅移民客。見工時,老細都講到明睇中我嘅空姐經驗,當時都唔係太明點解,到做落就明喇!」
初時落地返工,她也有適應期,除了規律的上下班時間,更要習慣私人時間也要工作,回應客人。「最難係要隨時WhatsApp回應客人,解答佢地嘅疑問。以前一落機就收工,百分百私人時間,想OT都無可能。但而家食食吓晚餐都要應個客,咁我又係新人,事事都想做到最好,畀好多壓力自己。」
壓力逼使她加速適應工作,更發掘出獨一無二的湊客之道。每個人的背景都不同,前往移民的人一定對想去的那個國家有許多幻想,她作為前空姐,剛好對英國和澳洲都十分了解。故而提供的意見,份外令客人信服。「我做空姐時就鐘意嘅國家就係英國同澳洲,都最常飛呢兩度,自己都打算搵夠錢就移民過去,成日同啲客人分享好多喺外國嘅真正生活經驗。慢慢摸到門路,做嘅生意都多咗好多,人工除咗底薪仲抽佣,加埋仲多過以前。」
▪ HR不成文規定的年齡歧視:40歲以後遇中年難就業困境怎麼辦?
▪ 搵到工、照顧家人、轉行……為5大離開理由度身訂造的英文辭職信(resignation letter)
攝於香港某餐廳,當日下班後與親友在餐廳晚飯。Amanda說,規律的上下班時間是一種新奇的體驗。
背景:任職空姐4年,2020年3月離職
現職:紅酒公司 Marketing Executive
收入:平均每月1萬6
Stephanie的轉工之前,已花費約3個月的時間找工作,曾經面試過大專院校的行政管理人員、大型公司的秘書、公關公司的市場推廣⋯⋯通通都沒有回音。她笑說:「空姐落咗地,以往嘅工作經驗基本上歸零。未搵工之前都心理準備,但到真係面對時依然好難堪、難受!」
攝於外國酒莊,Stephanie平時也喜愛飲酒。
後來,她篩選了一些公司和工作,可能與空姐經驗有所關聯,能夠幫她有機會加分。例如外貿公司,要求英語能力較高;紅酒公司,多與歐美國家打交道;移民公司,產品就是海外國家;鑽石出口公司,客人多是歐美商戶⋯⋯「林林總總,總之最好就可以善用到我嘅空姐經驗。另外,我地最叻就係外表見得吓人, 講嘢大方得體,呢啲野都係優勢。搵工時,盡量要顯示到呢一切!」
她最後成功加入一間紅酒公司,從低做起,至今還未適應。「我到今日仲調節緊心態!哈哈!一來係講資歷年齡,我始終大過同職級嘅同事好多,有啲心理關口。二來係人工同以前比少咗一截,消費習慣要改,同埋心底會忍唔住同以前大學同學比較,覺得自己廢。」話需如此,她也明白這是必經的過程,不是每人都能在空姐期間就找到人生新方向,甚至有所計劃。如果打算重新開始,就必須要接受這些待遇落差和心理關口。
此文章由原作者及Jobsdb HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及Jobsdb保留採取法律行動的權利。