八月十九日就係農曆七月初一,即係踏入中國傳統鬼月。唔知大家有無試過燒街衣?今次黑心商店就搵咗一間位於屯門紙紮舖嘅負責人︰彭氏夫婦!同大家講下經營三十年嚟見到嘅客人~
呢間紙紮舖位於屯門嘅一個屋邨街市,經營超過三十年。彭太直言︰「有咩人未見過?」曾經有客人相對豪爽,買嘢唔睇價錢,最後埋單差唔多二千蚊;但同時有人試過買一紮四十幾蚊嘅香,都要求彭太比個折頭,齊頭四十收順啲咁話!
負責收錢嘅彭太話,曾經有客人比左張$100 紙,找錢後堅持自己係比左$500。於是彭太打開收銀櫃再三檢查,根本就無收過$500 紙鈔;但係客人竟然要求行入收銀櫃檯,親自點算。連個收銀都要比埋你睇?彭太話:「咁不如你報警啦!」
彭太又話,原來有客人買左衣紙祭品返去燒比先人,有啲客真係「收到回音」、又有啲客覺得燒完祭品後變得吉利,開始行好運,咁之後就會一直返轉頭幫襯佢地,久而久之就成為熟客。
▪ 失業搵唔到工點算好?10個低成本創業及搵錢Idea兼成功例子
彭生亦都忍唔住同我分享,原來曾經有客人嘅小朋友唔舒服發燒,所以嚟買祭品拜神。彭生即刻話︰「小朋友唔舒服,我叫佢即刻睇醫生啦!仲拜咩神呀?」雖然經營紙紮用品舖,但彭氏夫婦非常開明,直言拜神燒衣只求心安理得,如果認為拜神後可以不藥而癒、不勞而獲簡直係無可能,到時就係由「信仰」變咗「迷信」!
彭氏夫婦話比我知,原來紙紮用品嘅旺季係清明節、重陽節,最後先到盂蘭節。係訪問當日舖頭亦有售賣七色紙,用嚟喺農曆七月初七拜祭七姐(織女),但係而家已經好少人識得拜七姐嘅習俗啦。
鋪頭內部格局。
結語︰彭氏夫婦直言,紙紮用品行業已經式微,做嘅都只係街坊生意。如果大家有機會行過紙紮舖,不妨行入去欣賞下呢項香港傳統手工藝。
黑心商店
香港90後,熱愛繪畫及恐怖片。於2016年創立Facebook 及 Instagram 專頁《黑心商店》,以黑色幽默 + 香港文化的恐怖插畫,為忙碌的香港人帶來一點歡樂。#重口味 #喪屍 #妖魔鬼怪 #香港文化 #haksumshop
此文章由原作者及Jobsdb HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及Jobsdb保留採取法律行動的權利。