地盤佬日誌-退休
有人辭官歸故里，有人漏夜趕科場。我哋建築業唔係好似其他行業咁大部份人都係有一個固定嘅退休年齡。有啲人會早啲有啲人會遲啲。
提早退休
有極少數人係晨早搵夠，可以提早去退休享受人生。不過多數人提早退休都係不情不願嘅，例如有以下情況：
工傷
大家最唔想見到嘅提早退休，就係嚴重工傷之後被迫收山，地盤危機四伏，每分鐘大家都要小心做好安全措施。
【中產起底】港人需2千萬先夠財自退休！打工仔如何從月入26K部署黃金十年 ？
行業被淘汰
我老竇以前就係專做裝修木工嘅，好主要做啲度尺入牆家私，之後90年代後期開始多數人都係買內地嘅做好嘅傢俬，咁就慢慢冇得做，之後就去咗做船廠，但係船廠嘅位置就係竹篙灣，後尾就拎咗嚟迪士尼之後又冇得做。
依家個世代變得更加快，可能政府一紙命令就可以摧毁一個行業，例如竹棚行業就好，可能比政府直接K.O.。 又例如M.I.C 都可以令到好多學嘅工人直接減少大半。政府近年大力推嘅機械人，例如佢嘅燒焊機械人可能好快可以取代專業燒焊工，到時只需要機械操作人員就得啦。而家呢個世代變化太快啦，唔似以前咁入門手藝就可以做過世，大家都要做好中年轉行嘅準備。
延遲退休
多數人延遲退休都不外乎係嗰幾個理由。
冇錢
建築業嘅退休保障其實係比較較差嘅，如果係日薪師傅好可能係接近冇退休金（好多時就算喺份糧度扣咗MPF，都係俾嗰啲判頭立咗冇真係供款），如果自己一路都冇儲錢準備退休，或者臨老入花叢俾啲河馬呃晒啲錢，逼住要繼續返工，有時甚至佢哋自己都專業做唔到要降級就去做地盤雜工佢哋都願意。
唔想退休無所事事
有另外一種人就係其實明明手上嘅錢都應該夠洗到過世。不過一唔返工就覺得無所事事，或者喺屋企對住個老婆，因為對嘅時間長咗突然間覺得佢好煩。所以就退休後可能只係休息一段短時間又走返出嚟做嘢。
其實一個退休嘅固定年齡，未必對每個人都適用，有啲人七八十歲都老當益壯仲好力過啲後生仔。有啲人四50歲就油盡燈枯無力再戰，所以實際嘅退休年紀都係應該因人而異。
