地盤佬日誌-代溝
每一代都梗有，啲人會話後生嗰班唔捱得，又有啲後生嘅會話老嗰班老頑固不思長進。每一代人嘅成長環境都唔同，往往就會有代溝。
老一代真係咁刻苦？
啲老細同高層成日都話新一代嘅後生仔唔捱得，不過講得呢句嘅好多時都係成功人士，佢哋會搵啲後生仔來同自己比，咁佢自己本身係比90%嘅人勤力，佢就覺得啲比70%人勤力嘅後生仔都係唔勤力。
不過佢哋冇諗過同佢哋一樣年紀嘅人都好多人係成條鹹魚咁。由後生去到中年都仲係懶懶閒，有一個廢青升到做一個老海鮮，初心不變，只係年紀變大。每一代都一定會有叻人同廢人，比例上應該每個年代都差唔多。用人就要用佢嘅優點，後生仔嘅優點就係有活力、多諗頭。發揮到下屬嘅優點先係一個好嘅上司或老闆。
老一代都係食古不化？
啲後生仔通常都覺得啲上司，食古不化鍾意用返套幾十年前嘅方法去做嘢，要求又高。
首先先講要求高先，好多小朋友啱啱畢業，就攞咗學校嗰套嚟返工，覺得係錯少少係冇問題嘅，50分合格咪得囉。但係返工係唔同嘅有機會做錯一樣嘢，就會令到成單嘢都衰咗，要洗好多錢或者搞好多嘢先至可以搞得掂返，所以啲上司通常係列關鍵點嗰度睇得好緊，少少錯都唔得。因為可能佢哋自己當年都舐過嘢有深切嘅痛。
一啲幾十年都用開嘅方法，啲後生仔會覺得點解仲咁old school 㗎，但係要明白到睇建築業裏面每個建造嘅方法，都要經過好多審批程序，時間嘅考驗，去證明嗰套方法係得嘅，如果貿貿然改咗其中一啲嘢係有機會令到程序唔啱，或者三幾年內就甩返晒落嚟。所以好多時啲高層都會對啲新嘅方法比較審慎。但係如果真係證明到嗰樣嘢係平靚正嘅，冇人會唔想改嘅。
【職場的說話藝術】打工仔要識聽上司10大潛台詞 學定積極及低調版應對方法
上司咩都管？打工仔遇控制強上司遭訓斥Lunch時間小睡 必學4招應對Micromanager
每一代都有佢嘅優點同缺點，大家都要互相體諒同包容。學習對方嘅好處用，對方嘅壞處做反面教材。
