地盤佬日誌 - 讀書冇用論
每個年代都會有人話讀書係冇鬼用嘅，又有人會話唔讀書嘅人就真係冇鬼用。
地盤裏面讀唔讀書嘅收入有咩分別？
好多啱啱畢業嘅工程師（甚至乎係啱啱攞到牌嘅工程師）都會覺得點解我讀咁多書，收入都唔夠一個扎鐵佬高？ 如果你只係用一個時間點，同某一啲特定嘅人去對比。咁樣無論贏輸都係睇你點樣去對比而決定啫。
有啲職業係「早期人工低，後期人工高」，有啲職業係「早期人工高啲，但係之後升幅會比較少」。所以要比較人工，有陣時係要比較「人生總工資」。
舉一個例子，多數紮鐵佬，係由白紙價幾年後就升到大工價，如果佢之後冇轉做判頭或者打理，基本上一世人嘅人工就係大工價，已經到頂。你搵個幾年年資嘅工程師嘅人工去同人哋嘅頂薪點做對比，就唔係太適合啦。正常工程師係大約做到高級工程師，就會超越晒地盤多數工人嘅人工。之後再進取啲，係會繼續一路有得升。
搵工攻略 | 7大筍工搜尋策略 善用Jobsdb提升求職效率
Offer到手冇咗？HR彈弓手苦主申訴：「臨簽約話請咗人」6招沉實應對職場突變
AI衝擊
依家呢一刻AI係衝擊所有各行各業嘅，文職當然係首當其衝，因為文職嘢AI訓練模型，只需要喺電腦裏面運算訓練就可以慢慢成熟；比起真實訓練一個實際做事嘅AI工作機械人成本會低好多，所以我覺得AI會取代文職人員會快過取代實際嘅工人，不過我都相信文職人員亦都唔會完全被取代嘅。
如果文職人員唔想咁快俾AI取代，想繼續有得做就要快啲由做嗰個，升level 去到做審核檢查嗰個。因為我暫時睇到嘅將來都係AI可以代理做，但係做完之後都要有個人去檢查審核，主要就係為嗰件事孭飛。
轉數慢 搵工難？？網民：唔夠醒目 慢beat打工仔要靠4招逆襲
AI 生成內容錯漏百出？5 步 Fact Check 懶人包＋指令教學
咁樣在職進修有冇用？
我覺得進修就好睇同你嘅專業對唔對口，如果係對口嘅當然係有用啦（可能係有實體用處，或者係無形嘅用處）。但係如果進修嘅係九唔搭八嘅嘢，咁樣就對你正職未必有真正用處。 有時可能直頭影響你返工嘅表現。 所以進修之前都係要諗清楚唔好賭錢落海。
幾十年前得1X ％嘅人可以讀到大學，所以大學生可以好容易平步青雲。去到近年阿豬阿狗只需要你有錢基本上大學畢業都唔難，學歷對搵好工嘅影響，冇以前咁大。但學歷依然係好多工作嚟講都係一個好重要嘅門檻，如果你冇呢個學歷好多嘢都係做唔到。
