地盤佬日誌－工程師出外國做嘢經驗
喺我認識嘅工程師裏面，原來都有好多人有去外地出差嘅經驗，同你地分享吓。
首先，其實香港工程師最多人出差嘅地點正常就係澳門同內地，不過基於政治正確同一國概念下，我就唔討論呢兩個地方。
先講近近地嘅亞洲其他地方
我認識嘅最多就係去新加坡，就連我十年前都試過突然間比老細捉咗入房話公司係新加坡中咗個項目，問我有冇興趣轉過去做，其實我有啲心動，不過嗰陣時啱啱同老婆喺澳門結婚，所以最後就拒絕咗。
之前做顧問公司嗰陣，公司都會接到啲東南亞嘅項目，例如越南、泰國、馬來西亞都試過。嗰陣負責啲同事每幾個禮拜就會唔見咗幾日，就係要飛過去開會（嗰個年代未興視像會議）。
另外最多人去過嘅，應該就係位於西亞嘅阿拉伯地區，200X年代嗰幾年係香港近代建築業最黑暗嘅年代，好多人冇嘢做，咁啱個幾年就係杜拜建築業最旺嘅年代。所以我聽返都有不少前輩高層，當年高價高福利咁去杜拜做幾年嘢。不過近年杜拜建築業已經冇之前咁風光。反而間唔中都會有啲朋友會去阿布扎比做。
會唔會衝出亞洲？
我都聽過部份人會去歐洲做嘢，例如之前間公司試過英國公司嗰邊唔夠人，掉啲香港公司嘅同事過去做幾年，亦都有同事試過要去德國嗰邊睇玻璃廠。
其實工程師除咗一啲好悶嘅工作之外，有時都會有啲新奇有趣嘅體驗。
港夫．李澳
香港土生土長，近年來移居澳門，一個熱愛畫畫的地盤工程師。開立了facebook page「港澳小不同」，通過圖文來與人分享我心中所想。
檢視此作者的所有文章
此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。
