地盤佬日誌-衰人往往會令地刻骨銘心
每個地方都有啲人係好好，有啲人你係好唔想見到嘅。地盤裏面都一樣。
咩都應承，咩都做唔到
地盤裏面有班人永遠都係吹水唔抹嘴，當你問到佢嗰陣時佢就乜嘢飛機大炮都得，但係做到嗰陣時就咩都做唔到。其實有陣時你做唔到咪做唔到囉，你做唔到大家就會自然安排其他人去做。你又要攬住來做最後又做唔到。之後就只係會令到一樣本身可以解決到嘅嘢變成一隻鑊。
A字膊
同頭先嗰種相反，有啲人係覺得咩都唔關佢事，就算明明嗰樣應該係佢嘅責任，佢都係唔理嘅。例如我試過對啲材料員，理應任何公司買嘅材料都係關佢事嘅，但係佢就永遠都係咩都唔知唔關佢事，啲材料到咗未到都唔知。但係呢啲嘢係你部門嘅責任你唔做又冇其他人做。又係最後會搞到一鑊粥嘅。
借錢L
地盤裏面不善理財嘅人其實都幾多，有啲係因為嚟開工不足屋企唔夠錢開飯，不過問人借錢裏面比率最多嘅都係因為為爛賭。仲要佢哋好多時喺圍內裏面借完一圈之後就會人間消失。當大家傾開嗰陣時就會發覺好多人多多少少都有借啲錢俾佢。
啲借錢L最衰嗰樣嘢仲係會情緒勒索，唔係話佢教咗好多嘢俾你，就係話同你係兄弟，再唔係話個仔發燒冇錢睇醫生。
有陣時就會來回這幾次，今次借$1000，嗰一排還咗之後再借$5000，再一排還咗之後再加大個數。到你唔借俾佢嗰陣時佢就話自己好守信用點解你唔借俾佢？
總之呢個世界上乜人都有，好人你未必記得到，但係衰人往往會令地刻骨銘心。
此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。
