地盤佬日誌-震撼XX億人嘅畫面
做地盤慢慢就會越嚟越大膽，不過回憶好多野第一次見都會好震撼，有啲直頭可能令人有心理陰影。等我又講下我自己嘅經驗。（重口味細膽慎入）
廁所 — 屎屎尿尿
當年我牛奶仔入地盤最震撼我嘅野一定係廁所同屎屎尿尿，當年入過一個廿幾樓嘅樓內藍色化學臨時廁所，一開個廁所門，見到個屎山差不多成一米高．我到今時今日我都仲未想到最後嗰個人係點屙舊屎上個咁高。之前地盤放藍色化學臨時廁所嗰個單位拆廁所之前泥水機電咩都未做，如果真係臭到無地盤佬入去做嘢，連大判個安全佬都講笑話入嗰個單位做嘢要按密閉空間工作要求先可以入去。
地盤裏面如果見到有一大舊紙就千祈唔好好奇99.999%係包屎嘅。係地盤任何奇怪到你想唔到嘅地方都發現過屎。
地盤樓內任何水你都要先假設佢係尿你先會安全。
小動物 — 昆蟲
之前試過樓內見過一舊黑色野，一行近就變咗一個白色食咗一半嘅飯盒，黑色個啲係滿滿嘅烏蠅。
之前去地庫水箱收貨，一開大光燈就見到幾百個黑點飛來飛去，全部係都蚊，難怪之前安全佬點鬧點罰都好，入去之前一定要放火燒吓紙皮之後先入去做嘢。
老鼠我最記得嘅事有兩個，第一有次同事們夾錢買咗好多包零食，之後第二日早上有人發現有包餅乾好似未開就漏氣，之後大家一齊檢查發現到每一包零食都漏氣，睇清楚每包都係有兩個細長孔，頂，隻老鼠真係黐線㗎，食佢就食死一兩包就好啦，包包都唔食只咬一口，最後要全部掉晒落垃圾桶。
有次架步有死老鼠味，之後所有同事一齊搵，搵咗兩個禮拜，臭足兩個禮拜。最後係假天花上面嘅一條管上面，之後先回復正常。
有一個記憶都好深，當年第一次開某個舊區嘅電井蓋，幾百隻曱甴又飛又跑一齊沖出嚟，嗰個畫面，我而家都仲記得。
入咗行十幾年雖然依家地盤衛生都係唔算好，但係同當年入行比較已經好咗好多。最少我地盤臨時廁所都真係有人清潔。希望令到我有心理陰影嘅畫面，以後都只係留低係我心底唔好再俾我見到啦。希望在明天。
港夫．李澳
香港土生土長，近年來移居澳門，一個熱愛畫畫的地盤工程師。開立了facebook page「港澳小不同」，通過圖文來與人分享我心中所想。
檢視此作者的所有文章
此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。
