地盤佬日誌-我哋住緊嘅樓有幾安全？
我個人認為，我哋住緊嘅樓係非常安全嘅！我可以係以下幾點解釋一下：
安全係數知多啲
其實所有嘅樓宇設計都會有好多安全係數喺度，首先計下假設嘅活荷載（ 一個規定假設的使用負重），住宅係假設200kg每平方米，商場係500kg每平方米。如果你屋企係500尺，就假設可以放到10噸野（包括上面嘅人），而商場就假設每一米可以企到6個80kg 嘅人（咁樣真係要企到膊頭貼膊頭，應該除咗追住姜濤攞簽名之外都冇乜可能會企到咁密）。
另外就係香港法定要求嘅安全係數永久負重（恆載）係要1.4倍、活荷載係要1.6倍。至於材料嘅安全係數，例如鋼筋喺計算嗰陣時，就會先當鋼筋嘅受力只係可以俾去到87% 。另外仲有工程師揀選材料時嘅剩餘，多數情況工程師都係會設計到受力使用上限嘅80-90%。所以將所有安全係數加埋正常，可以比設計預計受力多兩倍左右嘅情況下，都係安全嘅。
有冇偷工減料？
好多人都覺得建築係有偷工減料呢個情況。我自己係地盤咁多年裏面睇到嘅都係偷工可能有啲，但係減料係裝修都可能有啲，但係做結構就真係冇乜點見過。
偷工：始終建築都係一個由人去操控嘅工作，有人嘅元素就一定有手工嘅好唔好，同埋人係有惰性，會好多時想向更簡單更輕鬆嘅方法去做完啲嘢。有啲係簡化到快靚正嘅方法，但係有啲簡化到真係做錯晒件事。
減料：減料呢個情況喺裝修裏面都可能有發生，例如用啲比較平嘅雲石去換返一啲貴嘅雲石。但係喺樓宇結構基本上就好少會發生呢樣嘢。因為多數結構嘅材料例如鋼筋石屎都係由大判去買，判頭淨係出人去做，大判基本上唔會為咗慳果少少錢而博，因為一衰咗嗰個後果嚴重到俾佢透過少少錢多幾千倍。判頭因為淨係出人，基本上減咗料都對佢冇乜特別着數，誘因唔大。
咁有啲咩係危險㗎？
最危險一定係本身嗰個樓宇嘅結構設計工程師出錯，例如某個國家之前某次冧樓事件，最後俾人查到出嚟係原本嗰個設計師設計嗰陣時，將結構模型裏面嘅混凝土自重當左係零。
另外一樣出危險嘅就係懸臂結構（例如露台），因為其他正常嘅結構通常都係兩邊有柱，如果入邊出咗事都好，有另外一邊頂住都未必會成個冧（或者冧之前都有先兆，可以走得到）。但係懸臂結構得單邊支撐，如果出事就真係會即刻冧！
港夫．李澳
香港土生土長，近年來移居澳門，一個熱愛畫畫的地盤工程師。開立了facebook page「港澳小不同」，通過圖文來與人分享我心中所想。
此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。
