地盤佬日誌—我要扮驗樓師

FacebookWhatsAppTelegramEmailCopy Link

 

首先驗樓師其實唔係一個法定嘅專業資格,所以只要識做,人人都可以係驗樓師(當然唔係盲毛都可以做啦)。成日睇電視嗰啲驗樓節目,其實佢講嗰啲問題一般有足夠經驗嘅地盤工程師或者管工都會識得驗(只不過係公司有冇時間比佢去驗啫),不如今次就等我班門弄斧講下啲最常見嘅驗樓問題啦。

漏水

漏水係令小業主最頭痛又最常見的問題,裏面又有分來水、去水、防水、窗同外牆出問題。來水出大問題正常就盲毛都見到(爆水喉),去水同防水出大問題就多數係下面個業主話你知。窗同外牆都可以現場細心啲去做檢查,不過都唔夠打風之後睇咁準。

老鼠尾

其實多數好嘅牆身都有少少斜(幾mm)正常就睇唔出嘅,但係如果派瓦仔(瓷磚)啲起瓦線定得唔好,就有機會令到最後一嚿瓦仔(好細嚿或完整一嚿)之後剩返條罅,咁樣就差幾毫米都好礙眼。如同一件瓦仔一邊200mm、另一邊203mm,一般人肉眼都未必分得到,但係一邊3mm另一邊6mm就多數人都睇得出係斜。

▪ 地盤佬日誌—地盤衛生條件

▪ 地盤佬日誌—價錢、工期、質素成正比?

空鼓

泥水批蕩中最常見嘅問題之一,但乜嘢係空鼓呢?其實就係個批蕩同牆身分離咗,所以有嘢敲落去嗰陣時就會有打鼓咁嘅磅磅聲,主要成因有好多:例如批蕩嘅沙漿比例唔好、牆無好好咁濕潤就開始批蕩、做完之後有震盪等等理由。比較大面積嘅空鼓建議係要拆咗佢再做過,因為有成幅批蕩跌落嚟嘅風險。如果係小面積嘅空鼓,我自己個人嘅建議都可以唔理佢。因為有時搞完呢個位就會令到佢隔離有空鼓,咁樣搞下搞下就有排都未搞得掂(除非你嗰個地方真係唔急用)。

結構問題

除非間樓好舊(又有裂紋又爆石屎),如果就咁喺現場做咗裝飾面嘅情況下,冇人可以check到結構有咩問題,佢話睇到都係呃你。

幾時需要驗樓?

如果你買咗層樓返嚟諗住大裝修之後先住,你就只需要帶你個裝修師傅去睇下就得啦。如果係買某啲名牌發展商,我覺得驗唔驗都得,如果你對發展商信心不大,你又諗住直接買傢俬之後就入去住,而自己又唔識,就俾少少錢驗樓,咁都不失為一個好選擇。

 

港夫.李澳
香港土生土長,近年來移居澳門,一個熱愛畫畫的地盤工程師。開立了facebook page「港澳小不同」,通過圖文來與人分享我心中所想。

檢視此作者的所有文章
 

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

 

熱門文章
  正常一個人喺20歲之前,體力同埋智力都會不停上升。相反,多數人喺20歲之後,智力都係維持不變。但係,點解你會覺得有人愈嚟愈叻,係因為佢哋嘅學識同埋經驗有所累積,慢慢地大家有不可彌補嘅差距。 睇人經驗 地盤從來都係三山五岳咩人都...

十大熱門搜尋

Scroll to Top