地盤佬日誌—工作與生活平衡
最近見到有網友喺討論區度話：「啲返五日半、返六日嘅工，入面嘅年假同其他福利，都只係按勞工法例最低要求，所以全部都係垃圾！」我睇完笑而不語。因為如果按佢哋嘅定義，喺地盤裏面，九成嘅工都係垃圾工。
工作與生活平衡
其實喺我哋建築行業，除咗少部份人例如業主、政府、同某啲顧問之外，多數人嘅生活同工作都唔係好平衡（同而家嘅標準相比下）。先唔講工人，就算管理層，做顧問、設計師嘅，好多時候為咗入則或出標書，連續一兩個禮拜由擘大眼返工返到夜晚瞓覺先走，仲要最後一兩日嚟個通頂。
大判就多數都平時處理現場嘢，到咗OT先至會走去搞啲文件嘢。做得判頭嘅，多數都一條友跟幾個盤，有時可以中間蛇王吓。不過如果有盤爆鑊要諗計拆，都會搞到好煩。就算係皇家佬擺喺地盤嘅人，因為要跟返地盤嘅返工放工時間，所以工時都唔會短得去邊。
如果你係落手落腳做嘅師傅，就更加不在話下啦！通常飽就飽死，即係跟開啲老細旺場嘅話，幾十日甚至乎幾百人連續開工，都係好常見嘅事。但係唔好景嗰陣時，係屋企坐幾個月亦都係好尋常。所以除咗屋企唔係好憂柴米嗰啲師傅之外，多數人都好願意開OT，要好天劈埋落雨柴嘛！
點解地盤要一星期返六日？
因為我唔係日薪工，所以我個人嚟講係支持五天工作嘅。不過其實如果地盤真係實行五天工作（即係地盤星期六日完全唔開），對廣大市民來講係百害而無一利。首先工期會直線上升，例如一單本身如果六天工作可以三年完成嘅工程，五天工作的話可能三年半先會完成。咁嘅情況下，啲無法喺工程期間嘅避免嘅影響，例如塞車，噪音，灰塵等等⋯⋯都只係會對附近嘅居民造成更差嘅影響，而建成日子推遲，亦都影響之後嘅使用用家，例如等入公屋的小市民⋯⋯
另外，因為拖長左工期，所以建造成本都貴咗，包括建造嘅利息會多咗、多數機械都係以時間計錢、有啲月薪員工都係工期越長洗錢越多，仲有等等好多其他嘅理由。其中，政府工程所用嘅錢，都係納稅人嘅錢。就算係私人工程起貴咗，但正所謂羊毛出自羊身上，都會令到樓價同埋租金升高，最後都會影響民生。
喺呢個世界上，有邊個唔想做一啲「錢多、事少、近屋企」嘅工作啊！但係世事往往未能盡如人意，而地盤呢個行業最主要可以俾到嘅就係錢，所以其他嘅條件通常都係唔算太好。
就算你能力超凡，有一份十全十美嘅工作，但係世上九成嘅人嘅工作都唔係完美，多多少少都有所取捨，所以每個人都應該要對其他人嘅工作有足夠嘅尊重。
港夫．李澳
香港土生土長，近年來移居澳門，一個熱愛畫畫的地盤工程師。開立了facebook page「港澳小不同」，通過圖文來與人分享我心中所想。
此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。