地盤佬日誌 ─ 富一代。富二代
人人都想發達，唔通人人都發到達咩？
要發到達需要天時地利人和，有時有啲富二代覺得老竇一腳牛屎小學都未讀完，都可以搞到間公司咁大間，自己喺名牌大學讀完MBA，返到去一定可以糾正間公司嘅問題，令到間公司越做越大。不過通常都係賴嘢收場。
【建築系出路】畢業一定要做建築師？入門級筍工月薪直迫4萬 3大出路兼得前途與「錢」途
地盤要做判頭點先會成功？
點解有啲富一代可以小學都未畢業都可以成功搞到生意？首先你要睇返佢當年出嚟做嘢嗰年代可能大部份人都都係學歷唔高，佢嘅學歷喺嗰個年代可能未必特別差（分分鐘同而家大學生差唔多）。
天時地利
我唔否認地盤做盤頭都有黃金時代，有某啲時代開判頭真係好容易可以單單都大賺，不過有順境就一定有逆境，如果一盤生意可以做到幾十年，啲老細都真係有一定嘅抗逆能力，唔係淨係可以用一句好彩去形容。
專業能力
有啲判頭老細都係做開嗰行出身嘅，例如個老細係做開紮鐵嘅，之後就開咗間紮鐵公司，咁樣個老細點樣食住啲師傅係有某啲獨特嘅手法，係一個外人好難學得到嘅嘢嚟㗎。
收數能力
其實做工程唔難，做得好做得差都好都好，只要有錢一定可以完工起貨嘅。不過做完收唔收到錢先至係最後嘅重點。通常啲富一代同嗰啲想家高層都多多少少有啲交情、或者人哋走多少欠佢啲人情。到佢要收數收唔到嗰陣時會有啲其他嘅方法。
富二代嘅失敗原因
通常啲富二代都知書識禮、飽讀詩書，多數（最後失敗嗰班）佢哋返到公司就會覺得公司呢樣唔正規嗰樣冇效率，樣樣都想改。不過只可以話判頭公司好多灰色地帶先至可以令到佢賺到錢。例如某啲夥計好臭脾氣，但係幫你賺到錢嘅，你會唔會留佢呢？又例如有某啲交際費用，係咪可以輕易cut得啦？又例如係咪用最好嘅料用最好嘅師傅去做，定係睇餸食飯限米煮限飯？又會唔會係啲關鍵地方度慳錢搞到收唔到貨呢？
做生意成功有一百萬種方法，失敗就只有一個蝕錢。希望未來呢段艱難時間不論發展商大判定判頭都要頂得順，捱過呢個難關，咁就大家皆大歡喜。
