大家喺新聞上面,不時都會見到地盤佬被欠薪,搞到要堵塞馬路或做其他激進行為。我諗同其他行業相比,地盤佬(藝術家都係)被欠薪嘅比率應該係全港之冠。
一般情況下,多數師傅都會在欠薪半個月至一個月時開始追薪,不過一開始追嘅力度通常唔大,之後到欠薪幾個月先會加強力度去追。雖然的確有啲地盤佬係打緊風流工,但係其實多數師傅都係搵朝唔得晚,要佢哋冇糧出幾個月真係好影響佢哋同埋佢哋嘅家人。聽過有啲師傅因為俾人拖糧,搞到全家要周圍搵人借錢開飯,或者仔女無錢買新學期嘅書等等。
首先要講下香港嘅建築行業係點。首先業主(發展商)判畀大判,大判判畀二判(有時有三四五六判),之後再判畀炒家或搵蛇頭(炒家係啲三幾個人組成的小分判,蛇頭就係搵工人去做的中介人)去搵工人。經過咁多層嘅分判,是但一層走數(走佬),之後佢下面啲工人就好易有欠薪問題。
地盤佬欠薪有分兩種,一種係畀炒家或蛇頭食夾棍(走數),因為多數搵唔到個債主,所以通常都追唔到或冇得追。
第二種係分判拖下家數(小判頭),拖到下家都頂唔到數、出唔到糧畀工人。遇上呢啲情況,就會成間公司所有工人一齊出嚟示威追糧,因為咁樣做多數會吸引到記者嚟採訪(無人採訪嘅示威係冇用呀),亦會吸引到大判或發展商嘅注意。多數大公司都比較注意形象(雖然有啲都係唔要面㗎啦),就會對分判施壓,或先墊支畀工人,所以好多人都覺得唔上新聞就追唔到糧。
其實而家有部份發展商或大判,只要工人有返工就必定有糧出,依我觀察所得佢哋嘅建築品質都比其他公司好,所以其實出足糧都係一個雙贏局面。但呢個世界點都有啲急功近利,或為世所迫唔出糧嘅老闆,以而家嘅法例嚟講又好似冇佢哋辦法(有限公司執笠就搞掂);但係我覺得其實政府係有方法對付佢哋,例如有欠薪問題未解決嘅地盤,就唔俾佢出入伙紙,或者停佢政府工程投標。
其實做完嘢,收到應得嘅報酬係天經地義。希望各位高層同老闆將心比心,本着良心做人,出足糧畀工人。
港夫‧李奧
香港土生土長,近年來移居澳門,一個熱愛畫畫的地盤工程師。開立了facebook page「港澳小不同」,通過圖文來與人分享我心中所想。 |
延伸閱讀:
此文章由原作者及Jobsdb HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及Jobsdb保留採取法律行動的權利。